Rana Daggubati|വിവാഹ തീയതി വെളിപ്പെടുത്തി റാണാ ദഗുബാട്ടി

ബാഹുബലി താരം റാണാ ദഗുബാട്ടിയുടെ വിവാഹ വാർത്തകൾക്കായുള്ള കാത്തിരിപ്പിലാണ് ആരാധകർ. കോവിഡ് ലോക്ക്ഡൗണിനിടെയാണ് കാമുകി മിഹീക ബജാജുമായി വിവാഹിതനാകാൻ പോകുന്നുവെന്ന കാര്യം ദഗുബാട്ടി വെളിപ്പെടുത്തിയത്.

പിന്നാലെ വിവാഹ നിശ്ചയവും നടന്നു. അടുത്ത ബന്ധുക്കൾ മാത്രമാണ് വിവാഹ നിശ്ചയത്തിൽ പങ്കെടുത്തത്. ഇതിന്റെ ചിത്രങ്ങൾ ദഗുബാട്ടി ആരാധകർക്കായി പങ്കുവെയ്ക്കുകയും ചെയ്തിരുന്നു.

ഇപ്പോഴിതാ വിവാഹത്തീയതി വെളിപ്പെടുത്തിയിരിക്കുകയാണ് താരം. ഓഗസ്റ്റ് എട്ടിന് മിഹീകയുമായി വിവാഹിതനാകുമെന്നാണ് ദഗുബാട്ടി വ്യക്തമാക്കിയിരിക്കുന്നത്.

ഇന്ത്യ ടുഡ‍േയുടെ ഇ- മൈൻഡ് റോക്ക്സ് 2020നോട് സംസാരിക്കവെയാണ് ദഗുബാട്ടി ഇക്കാര്യം വ്യക്തമാക്കിയത്.

ഞാൻ വളർന്നിരിക്കുകയാണെന്ന് എനിക്ക് തോന്നുന്നു. വിവാഹിതനാകാൻ സമയമായി. എന്റെ പ്രതിശ്രുത വധു മിഹീക എന്റെ വീട്ടിൽ നിന്ന് മൂന്ന് കിലോമീറ്റർ അകലെയാണ് താമസിക്കുന്നത്. ഞങ്ങൾ ഒരേ പരിസരത്താണ്- ദഗുബാട്ടി വ്യക്തമാക്കുന്നു.

അവൾ സുന്ദരിയാണ്, ഞങ്ങൾ ഒരു മികച്ച ജോഡിയായിരിക്കും. ഞങ്ങൾ പരസ്പരം പോസിറ്റീവ് എനർജി നൽകുന്നു. ഓഗസ്റ്റ് 8 നാണ് ഞാൻ വിവാഹിതനാകുന്നത്- അദ്ദേഹം അറിയിച്ചു.

മിഹീകയെ വിവാഹം കഴിക്കുന്നത് തന്റെ ജീവിതത്തിലെ തന്നെ ഏറ്റവും മഹത്തായ മുഹൂർത്തമാണെന്നും ദഗുബാട്ടി പറഞ്ഞു.

മുംബൈ ആസ്ഥാനമായി പ്രവർത്തിക്കുന്ന ഡ്യൂ ഡ്രോപ്പ് ഡിസൈൻ സ്റ്റുഡിയോയുടെ സ്ഥാപകയാണ് റാണയുടെ വധു മിഹീക. ഹാഥി മേരി സാഥി, വിരാടപർവം എന്നിവയാണ് ദഗുബാട്ടിയുടെ ഇനി പുറത്തിറങ്ങാനുള്ള ചിത്രങ്ങൾ