മൂന്ന് ദിവസത്തിൽ മുതൽ മുടക്ക് തിരിച്ചു പിടിച്ച് ജവാൻ; റെക്കോർഡുകൾ തിരുത്തിയെഴുതി ഷാരൂഖ് ഖാൻ

ബോളിവുഡിൽ റെക്കോർഡുകൾ തിരുത്തിയെഴുതി മുന്നേറുകയാണ് ആറ്റ്ലീ സംവിധാനം ചെയ്ത ഷാരൂഖ് ഖാൻ ചിത്രം ജവാൻ.

ഷാരൂഖ് ഖാന്റെ ഏറ്റവും വലിയ ചിത്രമായ ജവാൻ റിലീസ് ചെയ്ത് മൂന്ന് ദിവസത്തിനുള്ളിൽ മുതൽ മുടക്ക് തിരിച്ചുപിടിച്ചിരിക്കുകയാണ്. 300 കോടിയോളം രൂപയാണ് ജവാന്റെ ആകെ ബജറ്റ്.

സെപ്റ്റംബർ ഏഴിന് പുറത്തിറങ്ങിയ ചിത്രം മൂന്ന് ദിവസത്തിനുള്ളിൽ 300 കോടിക്കു മുകളിൽ കളക്ഷൻ നേടി മുന്നേറുകയാണ്. ലോകമെമ്പാടുമായി ജവാൻ ഇതിനകം 350 കോടി നേടിയതായാണ് ട്രേഡ് എക്സ്പേർട്ട് മനോബലയുടെ ട്വീറ്റ്.

ഹിന്ദിയിൽ മാത്രം 73.76 കോടി, തമിഴിൽ 5.34 കോടി, തെലുങ്കിൽ 3.74 കോടി എന്നിങ്ങനെ ഇന്ത്യയിൽ മാത്രം ചിത്രത്തിന്റെ ആദ്യദിന കളക്ഷൻ. രണ്ടാം ദിവസം 53 കോടിയാണ് ഹിന്ദിയിൽ മാത്രം ചിത്രം നേടിയത്.

ഇന്ത്യയിൽ മാത്രം ചിത്രത്തിന‍്റെ കളക്ഷൻ 200 കോടിക്ക് മുകളിലാണ്. ഹിന്ദിയിൽ എക്കാലത്തേയും മികച്ച ഓപ്പണിങ് ആണ് ജവാന്റേത്. ഈ വർഷം ആദ്യം പുറത്തിറങ്ങിയ ഷാരൂഖ് ചിത്രം പഠാന്റെ റെക്കോർഡാണ് ജവാൻ മറികടന്നത്.

വിജയിയുടെ കരിയറിലെ ഏറ്റവും വലിയ കളക്ഷൻ നേടിയ വാരിസുവിന്റെ റെക്കോർഡ് മൂന്ന് ദിവസത്തിനുള്ളിൽ ജവാൻ മറികടന്നു.

ആറ്റ്ലീയുടെ ആദ്യ ബോളിവുഡ് ചിത്രമാണ് ജവാൻ. നയൻതാര ബോളിവുഡിൽ നായികയാകുന്ന ആദ്യ ചിത്രത്തിൽ വിജയ് സേതുപതിയാണ് വില്ലൻ വേഷം അവതരിപ്പിച്ചത്. ദീപിക പദുകോണും ചിത്രത്തിൽ പ്രധാന വേഷത്തിലെത്തുന്നുണ്ട്.