കോവിഡ് 19 ഭീതി തുടരുന്നു: സൗദിയിൽ ആദ്യ കേസ് സ്ഥിരീകരിച്ചു

ചൈനയിൽനിന്നു തുടങ്ങിയ കോവിഡ് ലോകമാകെ പരക്കുകയാണ്. വലിയ ഭീതിയാണ് കോവിഡ് 19 വൈറസ് ലോകമെങ്ങും ഭീതി ഉയര്‍ത്തുന്നുണ്ട്. മരണം ഇപ്പോൾതന്നെ മൂവായിരത്തിൽ അധികമാണ്.

ഇതിനിടെ സൗദി അറേബ്യയിലും രോഗം സ്ഥിരീകരിച്ചിട്ടുണ്ട്. ഇറാനിൽ നിന്ന് ബഹ്റൈൻ വഴി രാജ്യത്തെത്തിയ വ്യക്തിക്കാണ് രോഗം സ്ഥിരീകരിച്ചതെന്നാണ് അധികൃതർ അറിയിച്ചിരിക്കുന്നത്. 

ജിസിസി രാഷ്ട്രങ്ങളിൽ ഏറ്റവും അവസാനമായി കൊറോണ റിപ്പോർട്ട് ചെയ്യപ്പെടുന്ന രാജ്യമാണ് സൗദി. മറ്റെല്ലാ ഗൾഫ് രാഷ്ട്രങ്ങളിലും ഇതിന് മുമ്പ് തന്നെ കൊറോണ കേസുകൾ റിപ്പോർട്ട് ചെയ്യപ്പെട്ടിട്ടുണ്ട്. 

ഗൾഫ് മേഖലയില്‍ കൊറോണ റിപ്പോര്‍ട്ട് ചെയ്യപ്പെട്ടത് മുതൽ തന്നെ സൗദി പ്രതിരോധ പ്രവർത്തനങ്ങള്‍ ഊർജിതമാക്കി യിരുന്നു. അതുകൊണ്ട് തന്നെ എല്ലാവിധ അടിയന്തിര സാഹചര്യങ്ങളും നേരിടാൻ രാജ്യം സജ്ജമാണെന്നാണ് ആരോഗ്യവകുപ്പ് അധികൃതർ അറിയിച്ചിരിക്കുന്നത്. 

ഇതിനിടെ കോവിഡ് 19 ബാധിച്ച് വിവിധ രാജ്യങ്ങളിൽ മരണസംഖ്യ ഉയരുകയാണ്. യുഎസിൽ മരിച്ചവരുടെ എണ്ണം ആറായി. ഇറാനാണ് വലിയ രീതിയിൽ കോവിഡിന്റെ പിടിയിൽ ജീവാപായമുണ്ടായ ഒരു രാജ്യം. ഇവിടെ 54 പേർ മരിച്ചതായാണ് ഔദ്യോഗിക കണക്ക്

ഇറ്റലിയിൽ കൊവിഡ് ഭീതി കാരണം നാട്ടിലേക്കു മടങ്ങാനാകാതെ 85 ഇന്ത്യക്കാർ കുടുങ്ങിക്കിടക്കുകയാണ്. ഇതിൽ നാലു പേർ മലയാളികളാണ്. ഇവരെ നാട്ടിലെത്തിക്കാനുള്ള ശ്രമങ്ങൾ അതിവേഗം നടക്കുകയാണ്.

ഇന്ത്യയിൽ മൂന്നുപേർ കോവിഡ് 19 വൈറസ് പരിശോധനയിൽ പൊസിറ്റീവാണെന്ന് കണ്ടെത്തിയിട്ടുണ്ട്. ഒരാൾ ഡൽഹി സ്വദേശി. രണ്ടാമത്തെയാൾ തെലങ്കാനയിൽനിന്ന്. മൂന്നാമത്തെയാൾ ഇന്ത്യയിൽ സന്ദർശനത്തിനെത്തിയ ഇറ്റാലിയൻ സഞ്ചാരി

ഫെബ്രുവരി ഇരുപത്തഞ്ചിന് വിയന്ന-ഡൽഹി എയർ ഇന്ത്യ വിമാനത്തിൽ എത്തിയ ആളാണ് കോവിഡ് 19 പൊസിറ്റീവായി സ്ഥിരീകരിച്ചത്. ഈ വിമാനത്തിലുണ്ടായിരുന്ന പത്ത് കാബിൻ സ്റ്റാഫിനെയും ക്വാറന്റൈൻ ഘട്ടത്തിൽ നിരീക്ഷിക്കുന്നുണ്ട്.  ഇവരിൽ ആരെങ്കിലും രോഗലക്ഷണങ്ങൾ കാട്ടിയാൽ കൂടുതൽ പരിശോധന നടത്തും. 

ഫെബ്രുവരി ഇരുപത്തൊമ്പതിന് കോവിഡ് ലക്ഷണങ്ങൾ കാട്ടിയ ഇറ്റാലിയൻ സഞ്ചാരിക്കാണ് രാജസ്ഥാനിൽ വൈറസ് ബാധ സ്ഥിരീകരിച്ചത്. ആദ്യ പരിശോധനയിൽ നെഗറ്റീവ് ആയിരുന്നു.

ആരോഗ്യനില മോശമായപ്പോൾ നടത്തിയ രണ്ടാമത്തെ പരിശോധനയിലാണ് പൊസിറ്റീവാണെന്ന് സ്ഥിരീകരിച്ചത്. അതീവ ജാഗ്രത പുലർത്തണമെന്ന് കേന്ദ്ര ആരോഗ്യമന്ത്രാലയം നിർദേശിച്ചു.