കുറഞ്ഞ ശമ്പളക്കാരുടെ കുടുംബ വിസ പുതുക്കൽ; നിയന്ത്രണവുമായി കുവൈത്ത്

കുവൈത്ത് സിറ്റി: കുടുംബ വിസ പുതുക്കുന്നത് സംബന്ധിച്ച പുതിയ നിയമം കുവൈത്ത് നടപ്പാക്കി. ഇതനുസരിച്ച് കുറഞ്ഞ ശമ്പളക്കാരുടെ കുടുംബവിസ പുതുക്കുന്നതിന് നിയന്ത്രണമുണ്ട്. കുടുംബവിസ ലഭിക്കുന്നതിനുള്ള കുറഞ്ഞ ശമ്പള പരിധി 450 ദിനാറിൽനിന്ന് (1,06,711 രൂപ) 500 ദിനാറാക്കി (1,18567 രൂപ) ഉയർത്തി.

കുടുംബ വിസ സംബന്ധിച്ച നിയമം പുതുക്കിയ ഉത്തരവ് ആഭ്യന്തരമന്ത്രി ശൈഖ് ഖാലിദ് അൽ ജറാഹ് കഴിഞ്ഞ ദിവസം പുറപ്പെടുവിച്ചു. രാജ്യത്തെ മുഴുവൻ ഗവർണറേറ്റുകളിലും ഇതുസംബന്ധിച്ച നിർദേശം നൽകിയിട്ടുണ്ടെന്ന് ആഭ്യന്തരമന്ത്രാലയം അറിയിച്ചു.

പരിഷ്ക്കരിച്ച ശമ്പള പരിധിയിൽ ഉൾപ്പെടാത്തവരുടെ കുടുംബവിസ പുതുക്കുന്നതിന് നിയന്ത്രണമുണ്ടാകും. ഇതിനുള്ള അപേക്ഷ സ്വീകരിക്കാനുള്ള അധികാരം ഫർവാനിയ-ദജീജിലുള്ള താമസ കുടിയേറ്റ വിഭാഗം മേധാവിക്കു മാത്രമായിരിക്കും.