പശ്ചിമ ബംഗാളിൽ ഗുഡ്ഡ്സ് ട്രെയിൻ പാസഞ്ചർ ട്രെയ്‌നുമായി കൂട്ടിയിടിച്ച് 15 മരണം

പശ്ചിമ ബംഗാളിലെ രംഗപാണി സ്റ്റേഷന് സമീപം സീൽദായിലേക്കുള്ള കാഞ്ചൻജംഗ എക്‌സ്പ്രസുമായി ചരക്ക് ട്രെയിൻ കൂട്ടിയിടിച്ച് 15 പേർ മരിച്ചു. 60 ഓളം പേർക്ക് പരിക്കേറ്റു. രണ്ടു ലോക്കോപൈലറ്റുമാരും ഗാർഡും മരിച്ചവരിൽ ഉൾപ്പെടുന്നു. ഗുഡ്‌സ് ട്രെയിനിൻ്റെ ലോക്കോമോട്ടീവ് പിന്നിൽ നിന്ന് കൂട്ടിയിടിച്ചതിൻ്റെ ആഘാതത്തിൽ എക്‌സ്‌പ്രസ് ട്രെയിനിൻ്റെ മൂന്ന് പിൻ കമ്പാർട്ടുമെൻ്റുകൾ പാളം തെറ്റിയതായി റെയിൽവേ അധികൃതർ പറഞ്ഞു. നോർത്ത് ബംഗാളിലെ ന്യൂ ജൽപായ്ഗുരി സ്റ്റേഷനിൽ നിന്ന് 30 കിലോമീറ്റർ അകലെയുള്ള സ്ഥലത്ത് രക്ഷാപ്രവർത്തനം പുരോഗമിക്കുകയാണ്, പരിക്കേറ്റവരെ അടുത്തുള്ള ആശുപത്രികളിലേക്ക് മാറ്റുകയാണ്

കാഞ്ചൻജംഗ എക്‌സ്‌പ്രസിൻ്റെ എസ് 6 കോച്ചിലുണ്ടായിരുന്ന അഗർത്തലയിൽ നിന്നുള്ള ഒരു യാത്രക്കാരൻ തനിക്ക് പെട്ടെന്ന് ഒരു ഞെട്ടൽ അനുഭവപ്പെട്ടതായും കമ്പാർട്ട്‌മെൻ്റ് നിശ്ചലമായതായും പറഞ്ഞു. ദുരിതാശ്വാസ പ്രവർത്തനങ്ങളും രക്ഷാപ്രവർത്തനങ്ങളും വൈകിയെന്നും അദ്ദേഹം പരാതിപ്പെട്ടു.

'ഞാനും ഭാര്യയും കുട്ടിയും എങ്ങനെയൊക്കെയോ തകർന്ന കോച്ചിൽ നിന്ന് പുറത്തിറങ്ങി. ഞങ്ങൾ ഇപ്പോൾ ഒറ്റപ്പെട്ടിരിക്കുകയാണ്... രക്ഷാപ്രവർത്തനം വളരെ വൈകിയാണ് ആരംഭിച്ചത്,' യാത്രക്കാരൻ ഒരു ടെലിവിഷൻ ചാനലിനോട് പറഞ്ഞു

അപകടത്തിൽ മരിച്ച ഓരോരുത്തരുടെയും അടുത്ത ബന്ധുക്കൾക്ക് പ്രധാനമന്ത്രി നരേന്ദ്ര മോദി പിഎംഎൻആർഎഫിൽ നിന്ന് 2 ലക്ഷം രൂപ ധനസഹായം പ്രഖ്യാപിച്ചു. പരിക്കേറ്റവർക്ക് 50,000 രൂപ നൽകും. ദുരിതാശ്വാസ പ്രവർത്തനങ്ങൾ വിലയിരുത്താൻ റെയിൽവേ മന്ത്രി അശ്വിനി വൈഷ്ണവ് പശ്ചിമ ബംഗാളിലേക്ക് പോയി.