നിറം ചോക്ലേറ്റ് ബ്രൗൺ; ഉള്ളിൽ കിടിലൻ സൗകര്യം; നവകേരള ബസ് കേരളത്തിലേക്ക്

നവകേരള സദസിന് മുഖ്യമന്ത്രിക്കും മന്ത്രിമാര്‍ക്കും സഞ്ചരിക്കാനുള്ള പ്രത്യേക ബസ് ബെംഗളൂരുവില്‍ നിന്ന് കേരളത്തിലേക്ക് പുറപ്പെട്ടു. കോൺട്രാക്ട് ക്യാരേജ് പെർമിറ്റിലാണ് ബസ് രജിസ്റ്റർ ചെയ്യുന്നത് .

ബെംഗളൂരുവിലെ എസ്.എം കണ്ണപ്പ ഓട്ടോമൊബൈല്‍സ് പ്രൈവറ്റ് ലിമിറ്റഡ് (പ്രകാശ്) ആണ് അത്യാധുനിക സൗകര്യങ്ങളുള്ള ബസിന്‍റെ ബോഡി നിര്‍മ്മിച്ചത്.

ചോക്ലേറ്റ് ബ്രൗണ്‍  നിറത്തില്‍ ഗോള്‍ഡന്‍ വരകളോടെയുള്ള ഡിസൈനാണ് ബസിന് നല്‍കിയിരിക്കുന്നത്. ബസിന് പുറത്ത് 'കേരളം ദൈവത്തിന്റെ സ്വന്തം നാട്' (Kerala Gods On Country) എന്ന കേരള ടൂറിസത്തിന്‍റെ ആപ്തവാക്യവും ലോഗോയും  ഇംഗ്ലീഷില്‍ ആലേഖനം ചെയ്തിട്ടുണ്ട്.ടൂറിസ്റ്റ് ബസുകളുടെ വെള്ള നിറത്തിലെ കളർ കോഡ് ബാധകമല്ല.

ബസിന്‍റെ രജിസ്ട്രേഷന്‍ നമ്പര്‍ അടക്കം മറച്ചുകൊണ്ടാണ് നവകേരള സദസ് ബസിന്‍റെ സംസ്ഥാനത്തേക്കുള്ള യാത്ര.ബസിനായി 1.05 കോടി രൂപയാണ് ധനവകുപ്പ് പബ്ലിക് റിലേഷൻസ് വകുപ്പിന് അനുവദിച്ചിരുന്നു.

മുഖ്യമന്ത്രിക്ക് പ്രത്യേക ക്യാബിന്‍,  മന്ത്രിമാർക്ക് പ്രത്യേകം സീറ്റുകൾ, ബയോ ടോയ്ലെറ്റ്, ഫ്രിഡ്ജ്, ഡ്രൈവർക്ക് തൊട്ടടുത്തായി മുഖ്യമന്ത്രിക്ക് ജനങ്ങളെ കാണാനുള്ള സ്പോട്സ് ലൈറ്റുള്ള പ്രത്യേക സ്പേസ്, യോഗം ചേരാനുള്ള ഇടം തുടങ്ങിയവയാണ് ബസിലുള്ളതെന്നാണ് വിവരം.

ബസിന്‍റെ ഉള്‍വശത്ത് നിന്നുള്ള ദൃശ്യങ്ങള്‍ നാളെ ജനങ്ങള്‍ക്ക് കാണാനാകുമെന്നാണ് പ്രതീക്ഷ. സംസ്ഥാനം കനത്ത സാമ്പത്തിക പ്രതിസന്ധി നേരിടുമ്പോള്‍ 1.05 കോടി മുടക്കി ആഡംബര ബസ് വാങ്ങുന്നതിനെതിരെ വിമര്‍ശനം ഉയര്‍ന്നിരുന്നു.

നവകേരള സദസിന് ശേഷം ബസ് കെഎസ്ആര്‍ടിസിയുടെ ഭാഗമാക്കി ഉപയോഗിക്കാനാണ് സര്‍ക്കാര്‍ തീരുമാനിച്ചിരിക്കുന്നത്. KSRTCയുടെ ടൂറിസം പദ്ധതിക്കായി ബസ് ഉപയോഗിക്കും. സർക്കാരിനും സർക്കാർ നിർദേശിക്കുന്ന വിവിഐപി കൾക്കും ബസ് ആവശ്യപെടുമ്പോൾ വിട്ടു നൽക്കണം. മറ്റ് കോൺട്രാക്ട് ക്യാരേജ് ബസുകൾക്കുള്ള നിയമങ്ങൾ നവകേരള ബസിന് ബാധകമല്ലെന്ന് സർക്കാർ ഉത്തരവിറക്കി.