മലയും പാറയും കയറി പൊലീസ് സേന കല്ലുപ്പാറയിലെ കാടുകയറി; കുട്ടികൾക്ക് പുത്തനുടുപ്പും പുസ്തകവുമായി

സംസ്ഥാന വ്യാപകമായി സ്റ്റുഡൻറ് പോലീസ് കേഡറ്റ് പദ്ധതിയുടെ നേതൃത്വത്തിൽ നടപ്പിലാക്കി വരുന്ന പുത്തനുടുപ്പും പുസ്തകവും ക്യാമ്പയിൻ്റെ ഭാഗമായാണ് പോലീസ് സേന കാടു കയറിയത്.

വിതുരയിൽ നിന്ന് 6 കിലോമീറ്റർ മാത്രം അകലെയാണെങ്കിലും കല്ലുപാറയിൽ വാഹനക്കൾക്ക് എത്തിപ്പെടാൻ കഴിയില്ല. ദുർഘട പാതയിലൂടെ മലയും പാറയും കയറി വേണം ഇവിടെയെത്താൻ. പന്ത്രണ്ടോളം കുട്ടികളാണ് കല്ലുപാറയിൽ നിന്നും വിതുര സ്കൂളിലെത്തി പഠനം നടത്തുന്നത്.

കോവിഡിനെ തുടർന്ന് ഓൺലൈൻ വിദ്യാഭ്യാസം ലഭ്യമാകാതെ ദുരിതത്തിലായിരുന്നു കല്ലൂപ്പാറ സെറ്റിൽമെന്റ് കോളനിയിലെ വിദ്യാർത്ഥികൾ. ഇവർക്കായി വിതുര സി ഐ എസ് ശ്രീജിത്തിന്റെ നേതൃത്വത്തിൽ കോവിഡ് കാല പള്ളിക്കൂടം ഒരുക്കിയിരുന്നു.

ഇവിടേക്കാണ് തിരുവനന്തപുരം അഡീഷണൽ എസ്.പി.ഇ.എസ് ബിജുമോൻ്റെ നേതൃത്വത്തിൽ പോലീസ് ഉദ്യോഗസ്ഥരും അധ്യാപകരും എത്തിയത്.

സെറ്റിൽമെൻറിലെ മുഴുവൻ കുടുംബങ്ങൾക്കും വസ്ത്രങ്ങളും അവശ്യ വസ്തുക്കളും പുസ്തകങ്ങളും അടങ്ങിയ കിറ്റുകൾ വിതരണം ചെയ്തു. പ്രദേശവാസികൾക്കായി പൊലീസ് സംഘം കോവിഡ് ബോധവൽക്കരണവും നടത്തി. ഒപ്പം ദീപാവലി സമ്മാനമായി കുട്ടികൾക്ക് മധുര പലഹാരങ്ങളും വിതരണം ചെയ്തു.

പുത്തനുടുപ്പും പുസ്തകവും ക്യാമ്പയിന്റെ ഭാഗമായി ഒരു ലക്ഷത്തോളം രൂപയുടെ അവശ്യ വസ്തുക്കളാണ് ഇതിനോടകം ജില്ലയിലെ വിവിധയിടങ്ങളിൽ വിതരണം ചെയ്തത്.