ഇന്റർനെറ്റ് സിഗ്നൽ തേടി ഈ 12കാരൻ ഒന്നരകിലോമീറ്റർ യാത്ര ചെയ്യുന്നതെന്തിന്?

കൊറോണ അതിഭീകരമായി തന്നെ ബാധിച്ച ഇറ്റലിയിൽ ലോക്ക് ഡൗൺ പ്രഖ്യാപിച്ചിരിക്കുകയാണ്. വീടുകളിൽ നിന്ന് പുറത്തിറങ്ങുന്നതിനടക്കം കർശന നിയന്ത്രണങ്ങൾ. അധ്യയന വർഷം നഷ്ടമാകാതിരിക്കുന്നതിനായ സ്കൂളുകൾ ഓൺലൈനായി ക്ലാസുകൾ നടത്തി വരികയാണ്. തനിക്ക് ക്ലാസുകൾ നഷ്ടമാകാതിരിക്കാനാണ് ഗിയൂലിയോയുടെ ഈ യാത്ര. കാരണം വീടിരിക്കുന്ന സ്ഥലത്ത് ഇന്റർനെറ്റ് സിഗ്നൽ വളരെ മോശമാണ്. ഇവിടെ നിന്ന് ഒന്നരക്കിലോമീറ്റർ യാത്ര ചെയ്താൽ അതിമനോഹരമായ ഒരു സ്ഥലത്ത് ഒരു മരത്തിന് താഴെ സിഗ്നൽ നന്നായി ലഭിക്കുകയും ചെയ്യും. എല്ലാ കുട്ടികളും വീടുകളിലിരുന്ന് പഠിക്കുമ്പോൾ ഇളം സൂര്യന് താഴെ കുളിർമയുള്ള കാറ്റേറ്റാണ് ഗിയൂലിയോയുടെ പഠനം.

ആരും മോഹിക്കുന്ന സ്ഥലത്തിരുന്നാണ് പഠനമെങ്കിലും സ്കൂൾ തന്നെയാണ് തനിക്കിഷ്ടമെന്നാണ് ഗിയൂലിയോ പറയുന്നത്. അവിടെയാണെങ്കിൽ കൂട്ടുകാർക്കൊപ്പമിരിക്കാം.. ഇവിടെയും സ്ക്രീനിലൂടെ കാണാമെങ്കിലും അതു പോര നേരിട്ട് തന്നെ കാണണമെന്നാണ് ഈ പന്ത്രണ്ടുകാരൻ പറയുന്നത്.