ഇതെന്ത് ഭാഗ്യം! പ്രതിശ്രുത വരനും വധുവും ഒരേ ദിവസം രണ്ട് വിമാനാപകടങ്ങളില്‍ നിന്ന് രക്ഷപ്പെട്ടു

ഇറ്റലിയില്‍ ഒരേ ദിവസം രണ്ട് വ്യത്യസ്ത ഇടങ്ങളിലുണ്ടായ വിമാന അപകടങ്ങളില്‍ നിന്ന് പ്രതിശ്രുത വരനും വധുവും രക്ഷപ്പെട്ടു. സ്റ്റെഫാനോ പിരേലി(30) പ്രതിശ്രുത വധു അന്റോണിറ്റ ദെമാസി(22) എന്നിവരെയാണ് ഭാഗ്യം തുണച്ചത്. സുഹൃത്തുക്കളുമൊത്ത് ഒരുമിച്ച് കൂടാനുള്ള ഒരുക്കത്തിലായിരുന്നു ഇരുവരും. തുടര്‍ന്ന് രണ്ട് വ്യത്യസ്ത വിമാനങ്ങളില്‍ രണ്ടുപേരും സാവോണയിലേക്ക് പോയി. അവിടെ നിന്ന് ഭക്ഷണശേഷം ഇറ്റാലിയന്‍ നഗരമായ ടൂറിനിലേക്ക് പോകാനായിരുന്നു തീരുമാനം. ഈ യാത്രക്കിടെയാണ് രണ്ട് വിമാനങ്ങളും തകര്‍ന്നു വീണത്. രണ്ട് സീറ്റുകളുള്ള ടെക്‌നാം പി92 എക്കോ സൂപ്പര്‍ എന്ന വിമാനത്തിലാണ് സ്റ്റെഫാനോ യാത്രയായത്. യാത്രക്കിടെ ചില സാങ്കേതിക പ്രശ്നങ്ങൾ നേരിട്ട വിമാനം തകര്‍ന്നു വീഴുകയായിരുന്നു. ഇതേസമയം ബുസാനില്‍ നിന്ന് 25 മൈല്‍ അകലെയായി അന്റോണിയറ്റയുടെയും വിമാനവും തകരാറിലാകുകയും അപകടത്തില്‍പെടുകയുമായിരുന്നു. അപകടത്തില്‍ സ്റ്റെഫാനോയ്ക്ക് പരിക്കുകളൊന്നും ഉണ്ടായിരുന്നില്ല. അതേസമയം, അന്റോണിറ്റയ്ക്ക് ചെറിയ പരിക്കുകള്‍ പറ്റി. അപകടമുണ്ടായ സ്ഥലത്തുനിന്നും അഗ്നിരക്ഷാ സേനാംഗങ്ങള്‍ ഇരുവരെയും രക്ഷപ്പെടുത്തി.