ബോഡി മസാജിന് പെരുമ്പാമ്പുകൾ; ശരീര വേദനയ്ക്ക് 'ബെസ്റ്റ്' എന്ന് അനുഭവസ്ഥർ

ആദ്യമേ പറയാം, പാമ്പെന്ന് കേൾക്കുമ്പഴേ ബോധം പോകുന്നവരാണെങ്കിൽ ഈ വഴി പോകരുത്. അൽപ്പം ധൈര്യവും ഈ ബോഡി മസാജിന് ആവശ്യമാണ്. മുപ്പത് മിനുട്ടാണ് ഒരാൾക്ക് ബോഡി മസാജിനുള്ള സമയം. ഈ സമയം മുഴുവൻ പാമ്പുകൾ ശരീരത്തിന് പുറത്തുകൂടി ഇഴഞ്ഞു നീങ്ങും. ഇതിന്റെ വീഡിയോ റോയിട്ടേഴ്സ് പങ്കുവെച്ചിട്ടുണ്ട്.

വിഷമില്ലാത്ത പാമ്പുകളെയാണ് മസാജിന് ഉപയോഗിക്കുന്നത്. മസാജ് ചെയ്യേണ്ട ആളെ കമഴ്ത്തി കിടത്തി പുറത്ത് ആദ്യം നന്നായി എണ്ണയിട്ട് തടവും. ഇതിന് ശേഷമാണ് പാമ്പുകളെ ഇറക്കി വിടുന്നത്. പെരുമ്പാമ്പുകളടക്കം 28 വ്യത്യസ്തയിനം പാമ്പുകളെയാണ് മസാജിന് ഉപയോഗിക്കുന്നത്.

അരമണിക്കൂർ മസാജിന് ആറ് ഡോളറാണ് ഈടാക്കുന്നത്. പാമ്പ് മസാജ് ശരീരവേദനയും മസിൽ വലിവും കുറയ്ക്കുമെന്നാണ് സ്പായുടെ ഉടമ സഫ്വാത്ത് സെദ്കി പറയുന്നത്. കൂടാതെ ശരീരത്തിലെ രക്തയോട്ടവും കൂട്ടുമത്രേ. കച്ചവടത്തിന്റെ ആദ്യഘട്ടത്തിൽ കസ്റ്റമേഴ്സിനെ ലഭിക്കാൻ പ്രയാസമായിരുന്നുവെന്നും സഫ്വാത്ത് പറയുന്നു. എന്നാൽ ഒരു വട്ടം ഈ ബോഡിമസാജ് ചെയ്താൽ നിങ്ങൾ ഇതിന്റെ ആരാധകരാകുമെന്നും ഇദ്ദേഹം ഉറപ്പു തരുന്നു.