'തോറ്റു തൊപ്പിയിട്ട നാലു പേർ'; ഫേസ്‌ബുക്കിൽ സെൽഫ് ട്രോളുമായി പി.കെ ശ്രീമതി

ഫേസ്‌ബുക്കിൽ സെൽഫ് ട്രോളുമായി സി.പി.എം നേതാവ് പി.കെ ശ്രീമതി ടീച്ചർ. രണ്ട് വർഷം മുമ്പ് പാർലമെന്റിൽ ബജറ്റ് അവതരണത്തിന് ശേഷമെടുത്ത ചിത്രം ഫേസ്‌ബുക്കിൽ പങ്കുവച്ചാണ് ശ്രീമതി ടീച്ചറിന്റെ ട്രോൾ. 2014-19 കാലയളവിൽ ലോക്‌സഭയിൽ സി പി എം എം പിമാരായിരുന്ന പി.കെ ബിജു, ജോയ്‌സ് ജോർജ്, എം.ബി രാജേഷ് തുടങ്ങിയവർക്കൊപ്പമുളള ചിത്രത്തിന് തോറ്റു തൊപ്പിയിട്ട നാലു പേർ എന്നാണ് പികെ ശ്രീമതി ടീച്ചർ കുറിച്ചിരിക്കുന്നത്. സന്തോഷമായാലും സന്താപമായാലും സഞ്ചരിച്ച വഴിയിലൂടെയുളള തിരിഞ്ഞു നടത്തം ജീവിതാനുഭവങ്ങളെ വിശകലനം ചെയ്യാനും സ്വയം വിമർശനമായി വിലയിരുത്താനും കഴിയുമെന്നത്‌ തീർച്ചയായും ഗുണം ചെയ്യുമെന്നും അവർ കുറിച്ചിട്ടുണ്ട്.