34,000 രൂപയുടെ ഭക്ഷണം കഴിച്ച എട്ടംഗ കുടുംബം ബില്ല് അടയ്ക്കാതെ ഹോട്ടലിൽ നിന്ന് മുങ്ങി

റസ്റ്റോറന്റിൽ കയറി 34,000 രൂപയുടെ ഭക്ഷണം കഴിച്ച ശേഷം എട്ടംഗ കുടുംബം ബില്ല് അടയ്ക്കാതെ മുങ്ങി. വെയിൽസിലെ സ്വാൻസിയിൽ പുതുതായി പ്രവർത്തനമാരംഭിച്ച ബെല്ല സിയാവോ എന്ന റസ്റ്ററന്റിലാണ് സംഭവം. തങ്ങളുടെ ഫേസ്ബുക്ക് അക്കൗണ്ട് വഴി പങ്കുവച്ച പോസ്റ്റിലാണ് ഹോട്ടൽ അധികൃതർ സംഭവം വിശദീകരിച്ചത്. ഭക്ഷണം കഴിച്ച ശേഷം കൂട്ടത്തിലെ ഒരു സ്ത്രീ കയ്യിലുണ്ടായിരുന്ന ഒരു കാർഡ് ഉപയോഗിച്ച് ബില്ല് അടയ്ക്കാൻ ശ്രമിച്ചുവെന്നും എന്നാൽ രണ്ട് തവണയും ബില്ലടയ്ക്കാനായില്ലെന്നും തുടർന്ന് താൻ മറ്റൊരു കാർഡുമായി മടങ്ങി വരും വരെ തന്റെ മകനെ റസ്റ്റോറന്റിൽ നിർത്തണമെന്ന് പറഞ്ഞുകൊണ്ട് മകനെ റസ്റ്റോറന്റിൽ നിർത്തി സ്ത്രീയും മറ്റുള്ളവരും മടങ്ങിയെന്നും അധികൃതർ പോസ്റ്റിൽ വ്യക്തമാക്കി. അൽപ സമയത്തിന് ശേഷം റസ്റ്റോറന്റിൽ നിന്ന കുട്ടിയ്ക്ക് ഒരു ഫോൺ കോൾ വന്നുവെന്നും തനിയ്ക്ക് പോകണമെന്ന് പറഞ്ഞുകൊണ്ട് ആ കുട്ടി അവിടെ നിന്നും ഇറങ്ങി ഓടിയെന്നും അധികൃതർ പറഞ്ഞു. ഭക്ഷണം കഴിച്ച ശേഷം കുടുംബം ബില്ല് അടയ്ക്കാതെ മുങ്ങിയത് ഒരു നാണം കെട്ട പ്രവർത്തിയാണെന്നും റസ്റ്റോറന്റ് അധികൃതർ പോസ്റ്റിൽ പറഞ്ഞു.