പൊട്ടിവീണ വൈദ്യുതക്കമ്പി കടിച്ചു മാറ്റി യുവാവിനെ രക്ഷിച്ച വളർത്തുനായ ഷോക്കേറ്റു മരിച്ചു

ബുധനാഴ്ച രാവിലെയായിരുന്നു സംഭവം. അയൽ വീട്ടിൽ നിന്നും പാൽ വാങ്ങാനിറങ്ങിയ അജേഷിനൊപ്പം വളർത്തുനായയും ചേർന്നു. വീട്ടുമുറ്റത്ത് കിടന്ന അപ്പൂസ് അജേഷിന് മുന്നേ നടന്നു. ഇതിനിടെ  ഇടവഴിയിൽ പൊട്ടിക്കിടന്ന വൈദ്യുതിക്കമ്പിയിൽനിന്ന്‌ ഷോക്കേറ്റ് അപ്പൂസ് തെറിച്ചുവീണു. നായയെ രക്ഷിക്കാൻ അജേഷ് ഓടിയെത്തിയെങ്കിലും മുമ്പോട്ടുവിടാതെ കുരച്ചുകൊണ്ട് തടഞ്ഞു. ഇതിനു പിന്നാലെ കമ്പി കടിച്ചെടുത്ത് നീക്കിയിട്ടു. കടിച്ചുപിടിച്ച കമ്പിയുമായി വീണ അപ്പൂസ് മരണത്തിനു കീഴടങ്ങി.

കെ.എസ്.ഇ.ബി. ജീവനക്കാരെത്തി വൈദ്യുതിബന്ധം വിച്ഛേദിച്ചശേഷമാണ് നായയുടെ ജഡം മാറ്റിയത്. ശേഷം വീട്ടുവളപ്പിൽ സംസ്കരിച്ചു. കൂട്ടിക്കെട്ടിയ ഭാഗം കാലപ്പഴക്കത്താൽ വേർപെട്ടുപോയതാണ് വൈദ്യുതിക്കമ്പി പൊട്ടിവീഴാൻ കാരണം.