ഈ റസ്റ്ററന്റിൽ വന്നാൽ ഇഷ്ടം പോലെ വൈൻ കിട്ടും; പക്ഷെ കടുത്ത ഒരു നിബന്ധനയുണ്ട്

ഭക്ഷണ സമയത്ത് മൊബൈൽ ഫോൺ മാറ്റി വയ്ക്കാൻ തയ്യാറുള്ളവർക്ക് സൗജന്യമായി വൈൻ വാഗ്ദാനം ചെയ്ത് റെസ്റ്റോറന്റ്. ഇറ്റലിയിലെ വെറോണയിൽ സ്ഥിതി ചെയ്യുന്ന അൽ കോണ്ടോമിനിയോ എന്ന റെസ്റ്റോറന്റാണ് ഈ വ്യത്യസ്തമായ ഓഫറിലൂടെ സമൂഹ മാധ്യമങ്ങളിൽ ശ്രദ്ധ പിടിച്ചു പറ്റിയത്. റെസ്റ്റോറന്റ് ഉടമയായ ആഞ്ചലോ ലെല്ല മാർച്ചിലാണ് റെസ്റ്റോറന്റ് ആരംഭിക്കുന്നത്. റെസ്റ്റോറന്റിൽ എത്തുന്നവരെ അവരുടെ ഭക്ഷണത്തിലും ഒപ്പമുള്ളവരോടൊത്തുള്ള സംഭാഷണത്തിലും ശ്രദ്ധ കേന്ദ്രീകരിക്കാൻ പ്രേരിപ്പിക്കുന്നതിനും ഇടയ്ക്കിടയ്ക്ക് മൊബൈൽ നോക്കുന്ന പ്രവണത ഒഴിവാക്കുന്നതിനും വേണ്ടിയാണ് ഇത്തരമൊരു ഓഫർ തങ്ങൾ അവതരിപ്പിച്ചതെന്ന് ആഞ്ചലോ പറഞ്ഞു. ഭക്ഷണ സമയത്ത് മൊബൈൽ ഫോൺ മാറ്റി വയ്ക്കുന്നവർക്ക് വൗച്ചറുകൾ നൽകുന്ന നിരവധി റസ്റ്റോറന്റുകൾ നിലവിലുണ്ടെങ്കിലും അതിൽ നിന്നും വ്യത്യസ്തമായ ഒരു ഓഫർ അവതരിപ്പിക്കുന്ന നഗരത്തിലെ ആദ്യ റെസ്റ്റോറന്റാണ് അൽ കോണ്ടോമിനിയോ.