മുന്നറിയിപ്പുകൾ അവഗണിച്ച് ഫോട്ടോ എടുക്കൽ; യുവതിക്ക് നേരെ പാഞ്ഞടുത്ത് കരടി

മുന്നറിയിപ്പുകൾ അവഗണിച്ച് കരടികളുടെ അടുത്തേക്ക് പോയ യുവതിക്ക് നേരെ പാഞ്ഞടുത്ത് കരടി. അമേരിക്കയിലെ യെല്ലോസ്റ്റോൺ ദേശീയ പാർക്കിലാണ് സംഭവം. പാർക്കിലെ നിയന്ത്രണങ്ങൾ മറികടന്ന യുവതിയെ കണ്ടെത്തുന്നതിനായി അന്വേഷണം ഊർജിതമാണ്. ദേശീയ പാർക്കിൽ വന്യമൃഗങ്ങളെ കാണുമ്പോൾ 100 മീറ്ററെങ്കിലും അകലം പാലിക്കണം എന്നാണ് മുന്നറിയിപ്പുള്ളത്. എന്നാൽ ഇത് ലംഘിച്ച യുവതി രണ്ട് കുട്ടികളുമായി നിൽക്കുന്ന കരടിയുടെ അടുത്തേക്ക് ചെല്ലുകയായിരുന്നു. മൊബൈൽ ഫോണിൽ വീഡിയോ ചിത്രീകരിക്കുന്നതിനാണ് ഇവർ കരടികളുടെ സമീപത്തേക്ക് എത്തിയത്. യുവതി അടുത്ത് എത്തിയതോടെ കരടികളിൽ ഒന്ന് യുവതിക്ക് നേരെ പാഞ്ഞടുക്കുന്നത് കാണാം. ഇതോടെ ഭയപ്പെട്ട യുവതി പിന്നോട്ട് തന്നെ പോകുന്നതും ദൃശ്യങ്ങളിൽ ഉണ്ട്.