ഓണേഴ്സ് ഡിഗ്രിയും ഇന്റഗ്രേറ്റഡ് ഡിഗ്രിയും; ശ്രദ്ധിക്കേണ്ട കാര്യങ്ങൾ

ഓണേഴ്സ് പ്രോഗ്രാമുകൾക്കും ഇന്റഗ്രേറ്റഡ് കോഴ്സുകള്‍ക്കും, വലിയ പ്രാമുഖ്യമാണ് ഈയടുത്ത നാളുകളിലായി കണ്ടുവരുന്നത്. പഠന മേഖലയിൽ ആഴത്തിലുള്ള പഠനത്തിനുള്ള അവസരമാണ് ഇന്റഗ്രേറ്റഡ് കോഴ്സുകൾ വാഗ്ദാനം ചെയ്യുന്നത്. ദേശീയ വിദ്യാഭ്യാസ നയമുൾപ്പടെയുള്ള നയരൂപീകരണ സമിതികളിൽ കൂടുതൽ പ്രാധാന്യം ഈ കോഴ്സുകൾക്ക് നൽകപ്പെട്ടത് , ഗവേഷണ മേഖലയിലെ അഭിരുചി കൂടി പരിഗണിച്ചാണ്. അഞ്ചുവർഷത്തെ (Integrated Course) ഇന്റഗ്രേറ്റഡ് എം. എസ് സി. / ഇന്റഗ്രേറ്റഡ് എം.എ. പഠനത്തിന് അതുകൊണ്ട് തന്നെ, വലിയ പ്രാധാന്യം കഴിഞ്ഞ വർഷക്കാലയളവിലുണ്ടായിട്ടുണ്ട്. ഇതിന്റ ചുവടുപിടിച്ചാണ്, കഴിഞ്ഞ അധ്യയന വർഷത്തിൽ തന്നെ രാജ്യത്തെ കുറേയെറെ കോളേജുകളിൽ ഇന്റഗ്രേറ്റഡ് പഠനമെന്ന ആശയത്തിന് പ്രായോഗികത കൈവന്നത്.

പ്രൊജക്ടുകൾക്കും ഗവേഷണ അഭിരുചിക്കും പ്രാമുഖ്യം നൽകുന്ന നാലുവർഷ ബിരുദ പ്രോഗ്രാമായ ഓണേഴ്സ് ഡിഗ്രിയും ഇക്കാലയളവിൽ പ്രചുര പ്രചാരം നേടിയിട്ടുണ്ട്. വിദേശ സർവ്വകലാശാലകളിൽ പലതിലും ബിരുദാനന്തര ബിരുദ പഠനങ്ങൾക്ക് നാലു വർഷ ബിരുദ പ്രോഗ്രാമാണ്, അടിസ്ഥാനയോഗ്യതയെന്നത് മുഖവിലക്കെടുക്കേണ്ടതുണ്ട്. മൂന്നു വർഷം കൊണ്ട് പൂർത്തിയാക്കുന്ന പരമ്പരാഗത ബിരുദ പ്രോഗ്രാമുകൾക്കപ്പുറത്ത് ഗവേഷണ ശൈലികളെ പരിചയപെടുത്തുന്ന, എക്സിറ്റ് ഒപ്ഷൻ ഉണ്ടാകാനിടയുള്ള ഓണേഴ്സ് പ്രോഗ്രാമുകൾ വരും വർഷങ്ങളിൽ പ്രതീക്ഷിക്കാം. ബ്രിട്ടീഷുകാരുടെ ഭരണകാലത്തു തന്നെ, അക്കാലത്തെ പ്രധാന യൂണിവേഴ്സിറ്റികളിൽ ഓണേഴ്സ് ബിരുദമുണ്ടായിരുന്നതും ഇന്ത്യയിൽ പലയിടങ്ങളിലും ഓണേഴ്സ് ബിരുദങ്ങൾ തുടരുന്നതും ഓണേഴ്സ് ബിരുദ പ്രോഗ്രാമുകളുടെ മെറിറ്റിനെ സംബന്ധിച്ചുള്ള തെറ്റിദ്ധാരണകളും ഊഹാപോഹങ്ങളും മാറ്റാനിടയാക്കും.

പരമ്പരാഗതമായി തന്നെ ബിരുദ പഠനത്തിനൊപ്പം മറ്റേതെങ്കിലും ഡിപ്ലോമയോ സർട്ടിഫിക്കറ്റ് കോഴ്‌സോ ചെയ്യാനുളള അനുമതി നമ്മുടെ വിദ്യാഭ്യാസ സമ്പ്രദായത്തിലുണ്ടായിരുന്നു. എന്നാൽ നിലവിൽ രൂപീകൃതമായ ദേശീയ വിദ്യാഭ്യാസ നയം, സമൂലമായ മാറ്റങ്ങളാണ് , കോഴ്സുകളെ സംബന്ധിച്ചും അതിന്റ ഘടനകൾ സംബന്ധിച്ചും കാലപരിധി സംബന്ധിച്ചും നിർദേശിച്ചിട്ടുളളത്. ഒരേ സമയം രണ്ട് ബിരുദ കോഴ്‌സുകൾ ചെയ്യാൻ അനുമതി നൽകിയിട്ടുണ്ടെന്നത്, വിപ്ലവകരമായ വലിയ മാറ്റമായിട്ടാണ് അക്കാദമിക രംഗത്തെ വിദഗ്ധർ നോക്കിക്കാണുന്നത്. ആർട്‌സ്, സയൻസ് എന്നിങ്ങനെ വിഷയ കേന്ദ്രീകൃതമായ വേർതിരിവുകളിൽ ഒതുങ്ങി നിൽക്കാതെ വിദ്യാർത്ഥികളുടെ അക്കാദമിക് ജീവിതം സമഗ്രമായി വികസിപ്പിക്കുക എന്നതുതന്നെയാണ് , സമിതി വിഭാവനം ചെയ്ത ഈ പരിഷ്‌കരണത്തിന്റെ പ്രധാന ലക്ഷ്യം.

ദേശീയ വിദ്യാഭ്യാസ നയത്തിന്റെ ഭാഗമായി,ബിരുദ, ബിരുദാനന്തര, ഡിപ്ലോമ വിദ്യാർത്ഥികൾക്ക് മാത്രമാണ് , ഈ അവസരം നിജപെടുത്തിയിരിക്കുന്നത്. ഒരു സർവ്വകലാശാലയുടെ ബിരുദത്തിന് ഒരു അഫിലിയേറ്റഡ് കോളേജിൽ പഠിക്കുമ്പോൾ തന്നെ മറ്റൊരു സർവ്വകലാശാലയുടെ ബിരുദത്തിന് ഓൺലൈനായി ചേരാൻ സാധിക്കും. അതുമല്ലെങ്കിൽ രണ്ട് ഓൺലൈൻ കോഴ്‌സുകൾക്ക് , ഒരേ സമയം ചേർന്ന് പൂർത്തീകരിക്കാനും തടസ്സമില്ല. പരിഷ്ക്കരണ നിർദ്ദേശപ്രകാരം,പുതുതായി ബിരുദത്തിന് ചേരുന്നവർക്കും നിലവിൽ പഠിച്ചു കൊണ്ടിരിക്കുന്നവർക്കും രണ്ട് ബിരുദം ചെയ്യാൻ സാധിക്കും. ഇതു കൂടാതെ ഇപ്പോൾ ബിരുദത്തിനു പഠിച്ചുകൊണ്ടിരിക്കുന്ന രണ്ടാംവർഷക്കാർക്കും മൂന്നാം വർഷക്കാർക്കും , താൽപ്പര്യാനുസരണം ഒന്നാം വർഷ കോഴ്സിന് ചേരാവുന്നതാണ്.

ബിഎസ് സി കെമിസ്ട്രിക്കു മൂന്നാം വർഷത്തിൽ പഠിക്കുന്ന വിദ്യാർത്ഥിക്ക് താൽപ്പര്യമുണ്ടെങ്കിൽ പുതുതായി ബിഎ ഇക്കണോമിക്‌സിന് ചേരാവുന്നതും. എംഎസ് സി കമ്പ്യൂട്ടർ സയൻസു പഠിക്കുന്ന വിദ്യാർത്ഥിക്ക് , ബിഎ ഹിസ്റ്ററിക്കും പഠിക്കാനവസരമുണ്ടെന്നു ചുരുക്കം. അതായത്,റെഗുലർ എൽ.എൽ.ബി. പഠനം കോളേജിൽ ചെയ്യുന്ന വിദ്യാർത്ഥിക്ക് , താൽപര്യമുണ്ടെങ്കിൽ സായാഹ്ന കോളേജിൽ ബി.എസ് സി. മാത്തമാറ്റിക്സിനു ചേരാവുന്നതുമാണ്. ഇതിനു പുറമെ, ഒരേ സമയം രണ്ട് ബിരുദാനന്തര കോഴ്‌സുകൾ ചെയ്യാനും അവസരമുണ്ടാകും. എന്നാൽ പഠന മേഖലകൾവ്യത്യസ്ഥമായിരിക്കണം.

യുജിസിയുടെ നിഗമനമനുസരിച്ച്, ഈ പരിഷ്കരണത്തിലൂടെ സർവകലാശാലകൾ രണ്ട് ബിരുദം ചെയ്യാൻ വിദ്യാർത്ഥികൾക്ക് അവസരം ഒരുക്കും.വിദ്യാർത്ഥിക്ക് , തനിക്ക് പ്രവേശനം ലഭിച്ചിട്ടുള്ള സർവ്വകലാശാലക്കപ്പുറം, മറ്റൊരു സർവ്വകലാശാലയുടെ കോഴ്‌സ് പഠിക്കാമോയെന്നത് തീരുമാനിക്കാനുള്ള അധികാരം,അതതു സർവ്വകലാശാലയ്‌ക്കാണ്. ഇതോടൊപ്പം തന്നെ,ഇരട്ട കോഴ്‌സ് സൗകര്യം ലഭ്യമാക്കാനോ നിഷേധിക്കാനോ ഉള്ള സ്വാതന്ത്യം അതാതു സർവ്വകലാശാലകൾക്ക് ഉണ്ടാകുമെന്ന കാര്യത്തിലും തർക്കമില്ല.കോഴ്‌സുകളുടെ സമയക്രമം ഏകോപിപ്പിക്കേണ്ടത് വിദ്യാർത്ഥികളുടേയും അദ്ധ്യാപകരുടേയും മാത്രം ഉത്തരവാദിത്വമാണ്. വിദ്യാർത്ഥികളുടെ താൽപ്പര്യത്തിനനുസരിച്ച് ഒരു കോഴ്‌സ് ഓൺലൈനായോ വിദൂരപഠനമായോ രണ്ടാമത്തെ കോഴ്‌സ് കോളേജിൽ നേരിട്ട് പോയോ പഠിക്കാവുന്നതും വേണമെങ്കിൽ,രണ്ട് കോഴ്‌സുകളും ഓൺലൈനായോ ഡിസ്റ്റന്റ് എജുക്കേഷൻ മോഡിലോ ചെയ്യാനും തടസ്സമില്ല.

ഓൺലൈൻ വിദൂര കോഴ്‌സുകൾ തെരഞ്ഞെടുക്കുമ്പോൾ യുജിസി അംഗീകാരമുള്ള സർവ്വകലാശാലകളെ മാത്രം തെരഞ്ഞെടുക്കാൻ വിദ്യാർത്ഥികൾ ജാഗ്രത പുലർത്തണം. അതാതു സർവ്വകലാശാലകളുടേയും കോളേജുകളുടേയും മാനദണ്ഡങ്ങൾക്ക് വിധേയമായിട്ടായിരിക്കും വിദ്യാർത്ഥിയുടെ പ്രവേശനം നടക്കുക. മാത്രമല്ല; സ്ഥാപനത്തിലെ ഹാജർ നിലയുമായി ബന്ധപ്പെട്ട വിഷയങ്ങളിൽ അന്തിമ തീരുമാനം സർവ്വകലാശാലയുടേതു മാത്രമാകും. കോഴ്സുകളുടെ നടത്തിപ്പിനാവശ്യമായ മാർഗ്ഗരേഖ നൽകുകയെന്നതാണ് , യുജിസിയുടെ കർത്തവ്യം. ഈ മാർഗ്ഗരേഖയെ അടിസ്ഥാനമാക്കി , അതാതു വിദ്യാഭ്യാസ സ്ഥാപനങ്ങൾക്ക് സ്വതന്ത്രമായി തീരുമാനമെടുക്കാനുള്ള സ്വാതന്ത്ര്യം യുജിസി നൽകിയിട്ടുണ്ട്.

വിദൂര വിദ്യാഭ്യാസത്തിലൂടെ കോഴ്സ് പൂർത്തീകരിക്കുന്ന വിദ്യാർത്ഥികൾക്ക് ലഭിക്കുന്ന സർട്ടിഫിക്കേറ്റും റഗുലർ വിദ്യാർത്ഥികൾക്കു ലഭിക്കുന്ന സർട്ടിഫിക്കേറ്റും തമ്മിലുള്ള വ്യത്യാസം, വിദൂര വിദ്യാഭ്യാസ സ്കീമിലുള്ള വിദ്യാർത്ഥികളെയും റഗുലർ വിദ്യാർത്ഥികളേയും അക്കാദമിക തലത്തിൽ വേർതിരിക്കുന്നതായിരുന്നു. ഭൂരിഭാഗം സർവകലാശാലകളും വിദൂര വിദ്യാഭ്യാസത്തിലൂടെ നേടുന്ന സർട്ടിഫിക്കറ്റുകളിൽ വിദൂര വിദ്യാഭ്യാസമെന്ന് രേഖപ്പെടുത്തുന്നതിനാൽ കോഴ്സ് പൂർത്തീകരിക്കുന്ന വിദ്യാർത്ഥികളിൽ വലിയ പരാതികളും ഇതു സംബന്ധിച്ച് നിലവിലുണ്ടായിരുന്നു.