COVID 19| ഉറവിടം അറിയാത്ത രോഗികളുടെ എണ്ണം കൂടുന്നു; സമൂഹവ്യാപന സാധ്യതയെന്ന് വിദഗ്ധർ

കണ്ണൂരിലെ റിമാന്‍റ് പ്രതികൾ, തിരുവനന്തപുരത്തെ അബ്കാരി കേസ് പ്രതി, ചക്ക വീണ് ചികിത്സ തേടിയ കാസർഗോഡ് സ്വദേശി, കൊല്ലത്ത് പ്രസവ ശസ്ത്രക്രിയയ്ക്ക് എത്തിയ യുവതി. ഇടുക്കിയിലെ ബേക്കറി ഉടമ, തുടങ്ങി കോവിഡ് മൂന്നാംഘട്ട വ്യാപനത്തിൽ ഉറവിടം അറിയാത്ത രോഗികളുടെ എണ്ണം ഉയരുകയാണ്.

ഇവരില്‍ നിന്ന് സമ്പർക്കത്തിലൂടെ രോഗം പകരുന്നവരുടെ എണ്ണവും കൂടുകയാണ്. കണ്ണൂര്‍ ധര്‍മ്മടത്ത് ഉറവിടമറിയാതെ കോവിഡ് ബാധിച്ച് മരിച്ച രോഗിയില്‍ നിന്ന്  പകര്‍ന്നത് പതിനൊന്ന് പേര്‍ക്കാണ്.

ഈ സാഹചര്യത്തിലാണ് പരിശോധന വ്യാപകമാക്കാൻ സർക്കാർ തീരുമാനിച്ചത്. ദിവസവും രണ്ടായിരത്തോളം പരിശോധനകൾ നടത്തുന്നത് 3000 ആയി ഉയർത്താനാണ് തീരുമാനം. 14 ആരോഗ്യ പ്രവർത്തകരടക്കം 57 പേർക്കാണ് 19 ദിവസത്തിനുള്ളിൽ സമ്പർക്കത്തിലൂടെ രോഗബാധ ഉണ്ടായത്.