ഗുരുദ്വാരാ പരിസരത്ത് മദ്യപിച്ച മുപ്പതുകാരിയെ മതവികാരം വ്രണപ്പെടുത്തിയതിന് വെടിവെച്ചു കൊന്നു

പട്യാലയിൽ ഗുരുദ്വാര പരിസരത്ത് മദ്യപിച്ച യുവതിയെ വെടിവെച്ച് കൊന്നു. മതവികാരം വ്രണപ്പെടുത്തിയതിന്റെ പ്രകോപനത്തിലാണ് കൊലപാതകം നടത്തിയതെന്ന് അറസ്റ്റിലായ പ്രതി പോലീസിനോട് പറഞ്ഞു. ഞായറാഴ്ച ദുഖ് നിവാരൺ സാഹിബ് ഗുരുദ്വാരയിലെ ‘സരോവറിന്’ (വിശുദ്ധ കുളം) സമീപത്ത് വച്ച് ഏകദേശം മുപ്പത് വയസ്സ് പ്രായമുള്ള പർവീന്ദർ കൗർ എന്ന യുവതി മദ്യം കഴിച്ചിരുന്നു. ഇതിൽ പ്രകോപിതനായഗുരുദ്വാരയിലെ സ്ഥിരം സന്ദർശകനായ നിർമൽജിത് സിംഗ് സൈനി തന്റെ ലൈസൻസുള്ള റിവോൾവർ ഉപയോഗിച്ച് കൗറിന് നേരെ ഒന്നിലധികം തവണ വെടിയുതിർക്കുകയായിരുന്നുവെന്ന് പട്യാല സീനിയർ പോലീസ് സൂപ്രണ്ട് (എസ്എസ്പി) വരുൺ ശർമ്മ പറഞ്ഞു. ക്രിമിനൽ പശ്ചാത്തലമില്ലാത്തയാളാണ് ഭൂമിയിടപാടുകാരനായ സൈനി. കൗർ മദ്യലഹരിയിലായിരുന്നുവെന്നും മദ്യക്കുപ്പിയും പുകയില പാക്കറ്റുകളും കൗർ കൈവശം വച്ചിരുന്നതായും ഗുരുദ്വാരയുടെ മാനേജർ സതീന്ദർ സിംഗ് പറഞ്ഞു.