അറയ്ക്കൽ അബു മൂന്നാമതും വരും; ആട് 3 വരുന്നതായി സൈജു കുറുപ്പ്

ആട് 3യുടെ തിരക്കഥ വായിക്കാന്‍ ചിത്രത്തിലെ പ്രധാനപ്പെട്ട താരങ്ങളെല്ലാം ഒത്തുകൂടിയിരിക്കുകയാണ്. സൈജു കുറുപ്പാണ് സോഷ്യല്‍ മീഡിയയിലൂടെ ഇക്കാര്യം പുറത്തുവിട്ടത്. ”ആട് 3യുടെ നറേഷന്‍ സെക്ഷനിലേക്ക് കടുക്കുകയാണ്. അപ്‌ഡേറ്റുകള്‍ ഉടന്‍. സോമനും സേവ്യറിനുമൊപ്പം” എന്ന ക്യാപ്ഷനോടെയാണ് സണ്ണി വെയിനും, സുധി കോപ്പയ്ക്കൊപ്പമുള്ള ചിത്രം ആട് പരമ്പരയില്‍ അറക്കല്‍ അബുവായി എത്തുന്ന സൈജു പുറത്തുവിട്ടു.

ചിത്രത്തിന്‍റെ സംവിധായകന്‍ മിഥുന്‍ മാനുവല്‍ തോമസും ഈ ഒത്തുചേരലിന്‍റെ ചിത്രം പുറത്തുവിട്ടിട്ടുണ്ട്. ഈ വർഷം ക്രിസ്മസിന് ആട് 3 തിയറ്ററില്‍ എത്തും എന്നാണ് മിഥുന്‍ പോസ്റ്റില്‍ പറയുന്നത്. ഇമ്മിണി വല്യ സ്വപ്നയാത്ര തുടങ്ങുന്നു എന്നാണ് സംവിധായകന്‍ പറയുന്നത്. നിര്‍മാതാവ് വിജയ് ബാബു അടക്കം മിഥുന്‍ പങ്കുവച്ച ചിത്രത്തില്‍ കാണാം. എന്നാല്‍ ചിത്രത്തിലെ മുഖ്യകഥാപാത്രം ഷാജിപാപ്പനെ അവതരിപ്പിക്കുന്ന ജയസൂര്യ ചിത്രത്തില്‍ ഇല്ല.

2015ല്‍ ആണ് 'ആട്: ഒരു ഭീകര ജീവിയാണ്' എന്ന പേരില്‍ ആട് എത്തിയത്. തിയേറ്ററില്‍ ചിത്രം പരാജയപ്പെട്ടെങ്കിലും പിന്നീട് ടിവിയിലൂടെയും, സോഷ്യല്‍ മീഡിയയിലൂടെയും പടം അതിശയിപ്പിക്കുന്ന സ്വീകാര്യത നേടിയിരുന്നു. പിന്നാലെ രണ്ടാം ഭാഗം വേണമെന്ന ആവശ്യം പ്രേക്ഷകർ ഉയർത്തിയിരുന്നു.

2017ല്‍ ആണ് ആട് 2 എന്ന പേരില്‍ ഈ ചിത്രത്തിന്‍റെ രണ്ടാം ഭാഗം എത്തിയത്. ഈ ചിത്രം 2017ല്‍ ഏറ്റവും വലിയ കളക്ഷന്‍ നേടിയ മലയാള ചിത്രങ്ങളിലൊന്നായി. വമ്പന്‍ മുതല്‍ മുടക്കിലാണ് മൂന്നാം ഭാഗം എത്തുക എന്നാണ് റിപ്പോര്‍ട്ടുകള്‍.