Sushant Singh Rajput found dead | നടൻ, നർത്തകൻ, സംരംഭകൻ; 34 വയസിൽ ജീവിതം അവസാനിപ്പിച്ച് ബോളിവുഡ് പ്രിയതാരം

മുപ്പത്തിനാലാം വയസിലാണ് താരം വിട പറഞ്ഞിരിക്കുന്നത്. 1986 ജനുവരി 21ന് ജനിച്ച സുശാന്ത് ടെലിവിഷനിലൂടെയാണ് വെള്ളിവെളിച്ചത്തിലേക്ക് കടന്നത്. 2008ൽ സ്റ്റാർ പ്ലസിൽ സംപ്രേഷണം ചെയ്ത 'കിസ് ദേശ് മേം ഹെ മേരാ ദിൽ' ആണ് സുശാന്തിന്റെ ആദ്യത്തെ ടെലിവിഷൻ ഷോ. സീ ടിവിയിലെ 'പവിത്ര റിഷ്ത' എന്ന സീരിയലിലൂടെ താരമായി.

സിനിമ മാത്രമായിരുന്നില്ല സുശാന്ത് സിംഗ് രാജ്പുതിന്റെ മേഖല. വിദ്യാർത്ഥികൾക്ക് സഹായം എത്തിക്കുന്ന സുശാന്ത് ഫോർ എജ്യുക്കേഷൻ എന്ന പരിപാടിയുമായി സജീവമായിരുന്നു താരം.

2018ൽ പ്രളയത്തിൽ തകർന്നു നിന്ന കേരളത്തിന് ഒരു കോടി രൂപയാണ് സുശാന്ത് സിംഗ് രാജ്പുത് നൽകിയത്. അതേവർഷം, തന്നെ നാഗാലാൻഡിൽ വെള്ളപ്പൊക്കവും മണ്ണിടിച്ചിലും ഉണ്ടായപ്പോൾ ഒന്നേകാൽ കോടി രൂപയാണ് അദ്ദേഹം സംസ്ഥാനത്തിന് നൽകിയത്.

സീ ടിവിയിൽ സംപ്രേഷണം ചെയ്ത സീരിയൽ ആയിരുന്ന 'പവിത്ര റിഷ്ട'യിൽ സുശാന്തിനൊപ്പം അഭിനയിച്ച അങ്കിത ലോഖണ്ഡെയുമായി അദ്ദേഹം പ്രണയത്തിൽ ആയിരുന്നു. ആറു വർഷത്തോളം നീണ്ടുനിന്ന പ്രണയബന്ധം 2016ൽ ഇരുവരും ഉപേക്ഷിച്ചു. ബോളിവുഡിൽ സജീവമായ സുശാന്ത് നടി റിയ ചക്രവർത്തിയുമായി പ്രണയത്തിൽ ആയിരുന്നു. എന്നാൽ, തങ്ങളുടെ ബന്ധത്തെക്കുറിച്ച് തുറന്നുപറയാൻ ഇരുവരും തയ്യാറായിരുന്നില്ല. കഴിഞ്ഞ മാർച്ചിൽ ജിം കഴിഞ്ഞ് ഒരുമിച്ച് മടങ്ങിവരുന്ന സുശാന്തിന്റെയും റിയയുടെയും ചിത്രങ്ങൾ പാപ്പരാസികൾ പകർത്തിയിരുന്നു.

കഴിഞ്ഞ കുറച്ചു മാസങ്ങളായി സുശാന്ത് സിംഗ് രാജ്പുത് കടുത്ത വിഷാദരോഗത്തിന് അടിമായിരുന്നു എന്നാണ് അദ്ദേഹത്തിന്റെ മരണവാർത്ത അറിഞ്ഞ സുഹൃത്തുക്കൾ പറഞ്ഞത്. ഇൻസ്റ്റഗ്രാമിൽ സുശാന്ത് അവസാനമായി പങ്കുവെച്ചത് അമ്മയുടെ ചിത്രമായിരുന്നു.