വിവാദങ്ങളിൽ നിന്ന് മോചനമില്ലാതെ പുഷ്പ 2; അല്ലു പാടിയ 'ദമ്മൂന്റെ പട്ടുകൊര' ഗാനം യൂട്യൂബിൽ നിന്ന് നീക്കം ചെയ്ത് നിർമാതാക്കൾ

സിനിമാപ്രേമികൾ ഏറെ ആവേശത്തോടെ കാത്തിരുന്ന പാൻ ഇന്ത്യൻ ചിത്രമാണ് തെന്നിന്ത്യൻ സൂപ്പർ താരം അല്ലു അർജുൻ നായകനാക്കി സുകുമാർ സംവിധാനം നിർവഹിച്ച പുഷ്പ 2.കഴിഞ്ഞ ദിവസമാണ് ചിത്രത്തിൽ അല്ലു ആലപിച്ച ഗാനമായ 'ദമ്മൂന്റെ പട്ടുകൊര' അണിയറപ്രവർത്തകർ പുറത്തുവിട്ടത്.ഇപ്പോഴിതാ ഈ ഗാനം സമൂഹമാധ്യമങ്ങളിൽ നിന്നും നീക്കം ചെയ്തിരിക്കുകയാണ് ചിത്രത്തിന്റെ നിർമാതാക്കൾ. ചിത്രത്തിലെ അല്ലുവിനെ കഥാപാത്രമായ പുഷ്പയും ഫഹദ് ഫാസിലിന്റെ ബന്‍വാര്‍ സിങ് ഷെഖാവത്തും തമ്മിലുള്ള ഏറ്റുമുട്ടലാണ് ഗാനത്തിന്റെ പശ്ചാത്തലം. ഗാനത്തിന്റെ വരികളിൽ 'ധൈര്യമുണ്ടെങ്കിൽ തന്നെ പിടികൂടൂ' എന്ന തരത്തിൽ പുഷ്പ ഫഹദ് ഫാസിലിൻ്റെ കഥാപാത്രത്തെ വെല്ലുവിളിക്കുകയാണ്. പുഷ്പ 2-ന്റെ റിലീസ് ദിനത്തില്‍ തിയേറ്ററിലുണ്ടായ തിക്കിലും തിരക്കിലും പെട്ട് യുവതി മരിച്ച സംഭവത്തിന്റെ പശ്ചാത്തലത്തിൽ പാട്ടിലെ വരികൾ പോലീസിനെയും നിയമവ്യവസ്ഥയെയും പരിഹസിക്കും വിധമാണ് എന്ന ആരോപണം ഉയർന്ന സഹചര്യത്തിലാണ് നിർമാതാക്കൾ ഗാനം പിൻവലിച്ചത്.