വാർത്ത കണ്ട് വിളിച്ചത് സുരേഷ് ഗോപി മാത്രം; AMMAയുമായി ഇനി സഹകരിക്കില്ല; രാജിയിലുറച്ച് നടൻ ഹരീഷ് പേരടി

തന്റെ രാജി വാർത്തയറിഞ്ഞ് ആദ്യം വിളിച്ചത് സുരേഷ് ഗോപിയാണെന്നും ഹരീഷ് പേരടി വ്യക്തമാക്കി. പ്രസിണ്ടണ്ടിനും ജനറൽ സെക്രട്ടറിക്കും പേർസണൽ നമ്പറിൽ രാജി അയച്ചു കൊടുത്തു, AMMAയ്ക്ക് മെയിൽ ചെയ്യുകയും ചെയ്തു. എന്നാൽ, ഈ രണ്ടുപേരും തന്നെ വിളിച്ചിട്ടില്ല. പക്ഷേ രാജി വാർത്ത അറിഞ്ഞ നിമിഷം ആദ്യം വിളിച്ചത് സുരേഷ് ഗോപിയാണ്.

പല സൂപ്പർ നടൻമാർക്കും ഇല്ലാത്ത ഈ മനുഷ്യന്റെ മനുഷ്യത്വത്തോട് താൻ നന്ദിയുള്ളവനാണ്. അദ്ദേഹത്തെ ഓർക്കാതെ പോയാൽ വലിയ നന്ദികേടാകുമെന്നും സുരേഷ് ഗോപിയുടെ ചിത്രം പങ്കുവെച്ചുള്ള കുറിപ്പിൽ ഹരീഷ് പേരടി പറഞ്ഞു.

ലൈംഗീക പീഡനക്കേസില്‍ കുറ്റാരോപിതനായ നടന്‍ വിജയ് ബാബുവിനെതിരെ നടപടിയെടുക്കാത്തതില്‍ താരസംഘടനയ്ക്കുള്ളില്‍ തന്നെ എതിര്‍പ്പുകള്‍ തുടരുന്നതിനിടെയാണ് ഹരീഷ് പേരടി അംഗത്വം രാജിവെച്ചത്.

പൊതു സമൂഹത്തിന് ഒരിക്കലും ദഹിക്കാത്ത ക്രിമനലുകളെ സംരക്ഷിക്കുന്ന ഇത്രയും സ്ത്രീ വിരുദ്ധമായ നിലപാടുകൾ തുടരുന്ന A.M.M.A എന്ന സിനിമാ സംഘടനയിലെ തന്റെ പ്രാഥമിക അംഗത്വം ഒഴിവാക്കി തരണമെന്ന് സ്നേപൂർവ്വം അഭ്യർത്ഥിക്കുന്നതായി അദ്ദേഹം ഫേസ്ബുക്കിലൂടെ ആവശ്യപ്പെടുകയായിരുന്നു.