അബുദാബിയിലും ഒക്ടോബർ മുതൽ ടോൾ; അറിയേണ്ടതെല്ലാം

നാല് സാലിക് ടോൾ ഗേറ്റുകൾ സ്ഥാപിച്ചു. ശൈഖ് ഖലീഫ ബിൻ സായിദ് പാലം, ശൈഖ് സായിദ് പാലം, മുസഫ പാലം, അൽ മഖ്ത പാലം എന്നിവിടങ്ങളിലായിരിക്കും ഗേറ്റ്. തിരക്ക് കുറയ്ക്കുക, പൊതുഗതാഗതം ശക്തമാക്കുക, ഇലക്‌ട്രിക് വാഹങ്ങളുടെ ഉപയോഗം ശക്തമാക്കുക തുടങ്ങിയവയാണ് ഇതിലൂടെ ലക്ഷ്യമിടുന്നത്. സാലിക് നിലവിൽ വരുന്നതോടെ തിരക്കേറുന്ന സമയങ്ങളിൽ മണിക്കൂറിൽ നാലായിരം വാഹനം കുറയുമെന്നാണ് പ്രതീക്ഷ.

ശനിയാഴ്ച മുതൽ വ്യാഴാഴ്ചവരെ രാവിലെയും വൈകുന്നേരവും തിരക്കേറുന്ന സമയങ്ങളിൽ നാല് ദിർഹമാണ് സാലിക് നിരക്ക്. ബാക്കി സമയങ്ങളിലും വെള്ളിയാഴ്ചയും പൊതു അവധി ദിനങ്ങളിലും രണ്ട് ദിർഹമായിരിക്കും നിരക്ക്. ഒരു ദിവസം പരമാവധി 16 ദിർഹമാണ് ഒരു വാഹനത്തിൽനിന്ന് സാലിക് നിരക്ക് ഈടാക്കുക.

രാവിലെ 7 മണി മുതൽ 9 മണി വരെയും വൈകിട്ട് അഞ്ചു മണി മുതൽ ഏഴു മണി വരെയും

രാവിലെ 9.01 മുതൽ വൈകിട്ട് 4.59 വരെയും വൈകിട്ട് 7.01 മുതൽ രാവിലെ 6.59 വരെയും വെള്ളിയാഴ്ചകളിലും പൊതു അവധികളിലും

സാലിക് രജിസ്‌ട്രേഷനായുള്ള ഓൺലൈൻ സംവിധാനം ആഗസ്റ്റ് 30 മുതൽ പ്രവർത്തനക്ഷമമാവും. വാഹനത്തിന്റെ നമ്പർ പ്ലേറ്റിലാണ് രജിസ്‌ട്രേഷൻ നടത്തുക. തുടർന്ന് യൂസർ ഐഡിയും രഹസ്യ കോഡും എസ്എംഎസ് ആയി ലഭിക്കും. ഇതുപയോഗിച്ചാണ് അക്കൗണ്ടിൽ പണം നിറയ്ക്കേണ്ടത്. അക്കൗണ്ട് ബാലൻസ് എസ്എംഎസായി അറിയാൻ കഴിയും. ഇതിനായി പ്രത്യേക ചിപ്പ് വാഹനത്തിൽ ഘടിപ്പിക്കേണ്ട ആവശ്യമില്ല. ഗേറ്റ് കടക്കുന്ന വാഹന നമ്പർ സ്കാൻ ചെയ്ത് പണം ഈടാക്കുന്ന സംവിധാനമാണ് നിലവിൽ വരുക.

സാലിക് രജിസ്‌ട്രേഷൻ നടത്താത്ത വാഹനങ്ങൾക്ക് വലിയ പിഴ ലഭിക്കും. രജിസ്‌ട്രേഷൻ നടത്താതെ ഗേറ്റ് കടന്ന വാഹനത്തിന് ആദ്യ തവണ പത്ത് ദിവസം രജിസ്‌ട്രേഷൻ നടപടിക്കായി അനുവദിക്കും. ഈ കാലാവധിക്ക് ശേഷവും രജിസ്‌ട്രേഷൻ പൂർത്തിയാക്കിയില്ലെങ്കിൽ ഗേറ്റ് കടന്നാൽ ആദ്യ ദിനം 100 ദിർഹമാണ് പിഴ. രണ്ടാം ദിനം 200 ദിർഹമായും മൂന്നാം ദിനം 400 ദിർഹമായും പിഴ നിരക്ക് ഉയരും. ഇത് പരമാവധി 10,000 ദിർഹം വരെയാവും.