PUBG | പബ്ജി കളിക്കാനാകുന്നില്ല; 21കാരനായ വിദ്യാർഥി ആത്മഹത്യ ചെയ്തു

രാജ്യത്ത് കേന്ദ്രസർക്കാർ പബ്ജി നിരോധിച്ചതിനുശേഷം വിദ്യാർഥി ആരോടും ഒന്നും മിണ്ടാറില്ലായിരുന്നുവെന്ന് വീട്ടുകാർ പറയുന്നു. വെള്ളിയാഴ്ച രാവിലെ പ്രഭാതഭക്ഷണം കഴിച്ച ശേഷം പ്രീതം മുറിയിലേക്ക് പോയതായി അമ്മ രത്‌ന പറഞ്ഞു. "ഞാൻ അവനെ ഉച്ചഭക്ഷണത്തിന് വിളിക്കാൻ പോയപ്പോൾ, അവന്റെ മുറി അകത്തു നിന്ന് പൂട്ടിയിരുന്നു. നിരവധി തവണ വിളിച്ചിട്ടും വാതിൽ തുറക്കാതായതോടെ ഞാൻ അയൽക്കാരെ വിളിച്ചു. അവർ വാതിൽ തകർത്തു അകത്തുകയറിയപ്പോഴാണ് സീലിംഗ് ഫാനിൽ തൂങ്ങിമരിച്ച നിലയിലാണ് പ്രീതത്തെ കണ്ടത്," വിദ്യാർഥിയുടെ അമ്മ പറഞ്ഞു.

സംഭവത്തിൽ അസ്വാഭാവിക മരണത്തിന് കേസെടുത്തതായി പോലീസ് പറഞ്ഞു. PUBG കളിക്കാൻ കഴിയാത്തതിൽ മകന് നിരാശയുണ്ടായിരുന്നുവെന്ന് അമ്മ പറഞ്ഞു.

"അവൻ രാത്രിയിൽ ഇത് കളിക്കുമായിരുന്നു. PUBG കളിക്കാൻ കഴിയാത്തതിനാൽ അവൻ വലിയ വിഷമത്തിലായിരുന്നു" അവർ പറഞ്ഞു. മൊബൈൽ ഗെയിം കളിക്കാൻ കഴിയാത്തതിന്റെ പേരിൽ പ്രീതം ആത്മഹത്യ ചെയ്തതാണെന്ന് പോലീസ് പറഞ്ഞു. പോസ്റ്റുമോർട്ടത്തിനുശേഷം വിദ്യാർഥിയുടെ മൃതദേഹം വീട്ടുകാർക്ക് വിട്ടുനൽകി.