'ഉമ്മയുടെ ഖബറിടം സന്ദർശിക്കണം, ബാപ്പയോടൊപ്പം കുറച്ചുനാൾ കഴിയണം'; മഅദനി രാത്രി കൊച്ചിയിലെത്തും

ബെംഗളൂരു: പിഡിപി ചെയർമാൻ അബ്ദു നാസർ മഅദനി കേരളത്തിലേക്ക് തിരിച്ചു. സുപ്രീംകോടതി അനുവദിച്ച ജാമ്യവ്യവസ്ഥയിലെ ഇളവ് പ്രയോജനപ്പെടുത്തിയാണ് നാട്ടിലേക്ക് വരുന്നത്. കർണാടക സർക്കാരിൽനിന്ന് പ്രതികൂലമായി ഒന്നുമുണ്ടായിട്ടില്ലെന്ന് മഅദനി മാധ്യമങ്ങളോട് പറഞ്ഞു. വൈകിട്ട് 6.15നുള്ള ഇൻഡിഗോ വിമാനത്തിൽ ബെംഗളൂരുവിൽനിന്നു പുറപ്പെടുന്ന മഅദനി രാത്രി 7.20ന് കൊച്ചിയിലെത്തും. തുടർന്ന് കൊല്ലം അൻവാർശേരിയിലേക്ക് പോകും. വിചാരണത്തടവുകാരനായി ദീർഘനാളുകൾ കഴിയേണ്ടിവരുന്നതായും നിയമസംവിധാനത്തിന് ഇത് അപമാനമാണന്നും അധികാരികൾ ഇക്കാര്യം ആലോചിക്കണമെന്നും മഅദനി പറഞ്ഞു. ആരോഗ്യം വളരെ മോശമായ നിലയിലാണെന്നും അദ്ദേഹം കൂട്ടിച്ചേർത്തു.