പാലായിലെ തോൽവി: സ്വന്തം വോട്ട് ചോർന്നുവെന്ന് CPM; അത് അവരുടെ ആഭ്യന്തര കാര്യം, പ്രതികരിക്കാനില്ലെന്ന് ജോസ് കെ മാണി

പാലായിൽ ജോസ് കെ മാണിയുടെ തോൽവിക്ക് കാരണമായി സിപിഎം വോട്ടുകൾ ചേർന്നിട്ടുണ്ട് എന്ന് ഇന്നലെ ചേർന്ന സംസ്ഥാന സെക്രട്ടേറിയറ്റ് യോഗം വിലയിരുത്തി. പാലായിലെ തോൽവി പ്രത്യേകം പരിശോധിക്കാനും സിപിഎം സംസ്ഥാന സെക്രട്ടേറിയറ്റ് തീരുമാനിച്ചു. നേരത്തെ ജോസ് കെ മാണി ഇതു സംബന്ധിച്ച സിപിഎം നേതൃത്വത്തിന് പരാതി നൽകിയിരുന്നു. പാലായിൽ സിപിഎം വോട്ടുകൾ പൂർണമായും വീണില്ല എന്നായിരുന്നു  ജോസ് കെ മാണിയുടെ പരാതി. ജോസ് പരാതി പറഞ്ഞ സാഹചര്യത്തിൽ കേരള കോൺഗ്രസിനെ പിണക്കണ്ട എന്ന നിലപാടിലാണ് സിപിഎം.

Also Read-  'ജയം ഉറപ്പായിരുന്ന അഞ്ച് മണ്ഡലങ്ങൾ നഷ്ടപ്പെടുത്തി': CPM സംസ്ഥാന സെക്രട്ടേറിയറ്റ്

അതേസമയം പാലായിലെ തോൽവി സംബന്ധിച്ച് പ്രാഥമിക വിലയിരുത്തൽ പാർട്ടി നടത്തിയത് എന്താണ് എന്ന ചോദ്യത്തോട് ജോസ് കെ മാണി പ്രതികരിച്ചില്ല. ഇത് പാർട്ടിയുടെ ആഭ്യന്തര കാര്യങ്ങൾ ആണ് എന്ന് മാത്രം പറഞ്ഞ് ജോസ് കെ മാണി ഒഴിഞ്ഞുമാറി. തെരഞ്ഞെടുപ്പ് സമയത്ത് തന്നെ പാലായിൽ സിപിഎം കേരള കോൺഗ്രസ് എം വിഭാഗങ്ങൾ തമ്മിൽ പലയിടത്തും നിസ്സഹകരണം ഉണ്ടായിരുന്നു. സിപിഎം അംഗമായ ബിനു പുളിക്കക്കണ്ടവും കേരള കോൺഗ്രസ് നേതാവായ ബൈജു കൊല്ലം പറമ്പിലും നഗരസഭയിൽ അടി പിടി ഉണ്ടാക്കിയത് തെരഞ്ഞെടുപ്പിന് തൊട്ടുമുമ്പായിരുന്നു.

Also Read- 'സര്‍ക്കാരിന് നാണക്കേട് ഉണ്ടാക്കരുത്, പരസ്യപ്രതികരണം വേണ്ട'; INLന് സിപിഎമ്മിന്റെ താക്കീത്

പാലായിൽ സിപിഎം വോട്ടുകൾ ചേർന്നിട്ടില്ല എന്നായിരുന്നു  അന്ന് ജില്ലാ സെക്രട്ടറിയും ഏറ്റുമാനൂരിലെ സ്ഥാനാർഥിയുമായ വി എൻ വാസവൻ പ്രതികരിച്ചത്. ബിജെപി വോട്ടുകൾ ചോർന്നത് മൂലമാണ് മാണി സി കാപ്പൻ വിജയിച്ചത് എന്നും സിപിഎം ആരോപിച്ചിരുന്നു. ഇതേ നിലപാട് തന്നെയായിരുന്നു ജോസ് കെ മാണിയും തെരഞ്ഞെടുപ്പ് പരാജയത്തിന് തൊട്ടുപിന്നാലെ മാധ്യമങ്ങൾക്ക് മുന്നിൽ അറിയിച്ചിരുന്നത്.  അതിനുശേഷമാണ് സിപിഎം വോട്ട് ചോർന്നു എന്ന പരാതി ജോസ് കെ മാണി നൽകിയത്. ബിജെപി വോട്ടുകൾ മാണി സി കാപ്പന് ലഭിച്ചതാണ് തോൽവിക്ക് കാരണം എന്ന് പരസ്യമായി കൊണ്ടുവരാനാണ് കേരള കോൺഗ്രസ് എമ്മും സിപിഎമ്മും ശ്രമിക്കുക. എന്നാൽ പ്രാദേശികതലത്തിൽ ഉണ്ടായ തർക്കം തെരഞ്ഞെടുപ്പിൽ വലിയ രീതിയിൽ ജോസ് കെ മാണിയുടെ തോൽവിക്ക് കാരണമായി എന്ന വിലയിരുത്തലാണ് ആഭ്യന്തരമായി പാർട്ടികൾ നടത്തിവരുന്നത്.