'അനിൽ അക്കര തന്നെയാണോ നീതു എന്ന് പറഞ്ഞ് കത്തയച്ചതെന്ന് പറയാനാകില്ലല്ലോ'; പരിഹാസവുമായി DYFI സംസ്ഥാന സെക്രട്ടറി എ.എ റഹീം

നീതു എന്നൊരു ക്യാരക്ടർ യഥാർത്ഥത്തിൽ ഉണ്ടോയെന്നും അവർ കത്തയച്ചോയെന്നും അറിയില്ല. അവർ ആരാണെന്നും അറിയില്ല. ഇനി സതീശൻ കഞ്ഞിക്കുഴി തന്നെ സ്വന്തമായി കത്തെഴുതി ചെയ്തതാണോയെന്ന് ആർക്കറിയാൻ പറ്റുമെന്നും അദ്ദേഹം ചോദിച്ചു. അവർ അതൊക്കെ ചെയ്യുമെന്നും സ്വന്തമായി വീടിന് തീവച്ചിട്ട് വാർത്താപ്രാധാന്യം കണ്ടെത്തിയ നേതാവ് ചെറിയ ആളൊന്നുമല്ല കെപിസിസി നേതാവാണെന്നും എ.എ റഹീം പറഞ്ഞു.

കഴിഞ്ഞദിവസങ്ങളിലാണ് സോഷ്യൽ മീഡിയയിൽ നീതു ജോൺസൺ എന്ന കുട്ടിയുടെ പേരിലുള്ള കത്ത് വൈറലായത്. ലൈഫ് മിഷൻ പദ്ധതിയിൽ തനിക്കും കുടുംബത്തിനും ഒരു വീട് ലഭിച്ചിട്ടുണ്ടെന്നും രാഷ്ട്രീയം കളിച്ച് അത് എംഎൽഎ തകർക്കരുതെന്നും ആവശ്യപ്പെട്ടായിരുന്നു കത്ത്. സോഷ്യൽ മീഡിയയിലും കത്ത് വൈറലായിരുന്നു. നീതു ജോൺസണെ കണ്ടെത്താൻ ശ്രമം നടന്നെങ്കിലും കണ്ടെത്തിയില്ല.

ഇതിനെ തുടർന്ന് ഇന്ന് രാവിലെ ഒമ്പതുമണിമുതൽ അനിൽ അക്കര എംഎൽഎയും രമ്യ ഹരിദാസ് എംപിയും ഉൾപ്പെടെയുള്ള നേതാക്കൾ റോഡരികിൽ നീതുവിനെ കാത്തിരുന്നു. പക്ഷേ, കണ്ടെത്താൻ കഴിഞ്ഞില്ല. ഇതിനെ തുടർന്ന് നീതുവിനെ കണ്ടെത്താൻ പൊലീസിന്റെ സഹായം തേടിയിരിക്കുകയാണ് അനിൽ അക്കര എംഎൽഎ. വടക്കാഞ്ചേരി പൊലീസിലാണ് എം എൽ എ പരാതി നൽകിയിരിക്കുന്നത്.