സമൂഹമാധ്യമങ്ങളിൽ പരിധി വിടരുത്; വിമർശിക്കുന്നവർക്കെതിരെ സ്ഥാപനങ്ങൾക്ക് നടപടി എടുക്കാം

കൊച്ചി: സമൂഹമാധ്യമങ്ങളിലൂടെയുള്ള വിമർശനങ്ങൾ പലപ്പോഴും പരിധി വിടുന്നുവെന്ന് ഹൈക്കോടതി. ഇത്തരത്തിൽ വിമർശിക്കുന്ന ജീവനക്കാർക്കെതിരെ സ്ഥാപനങ്ങൾക്ക് നടപടി എടുക്കാമെന്ന് കോടതി വ്യക്തമാക്കി. വൈകാരികമായ പ്രതികരണം അഭിപ്രായസ്വാതന്ത്ര്യത്തിന്‍റെ ഭാഗമാണെങ്കിലും ചില സമയങ്ങളിൽ ജീവനക്കാരുടെ പ്രതികരണം സ്ഥപാന താൽപര്യത്തിന് വിരുദ്ധമാകാറുണ്ടെന്നു ഹൈക്കോടതി പറഞ്ഞു. ഇക്കാര്യത്തിൽ മാർഗരേഖയില്ലാത്തതാണ് പ്രശ്നങ്ങൾക്ക് കാരണമാകുന്നത്. എന്നാൽ സ്ഥാപന താൽപര്യത്തിന് വിരുദ്ധമല്ലാത്ത കാര്യങ്ങളിൽ ജീവനക്കാർക്ക് അഭിപ്രായ സ്വാതന്ത്ര്യമുണ്ടെന്നും കോടതി വ്യക്തമാക്കി. സമൂഹമാധ്യമത്തിൽ പ്രതികരിച്ചതിന്‍റെ പേരിൽ എം.ജി സർവകലാശാല ജീവനക്കാരന്‍റെ സസ്പെൻഷൻ റദ്ദാക്കിക്കൊണ്ടാണ് ശ്രദ്ധേയമായ നിരീക്ഷണങ്ങൾ ജസ്റ്റിസ് മുഹമ്മദ് മുസ്താഖ് നടത്തിയത്. അസിസ്റ്റന്‍റായ എ.പി അനിൽകുമാറിന്‍റെ സസ്പെൻഷനാണ് റദ്ദാക്കിയത്.