വിശക്കുന്നവന് അന്നമേകി തെക്ക്യാവ്; റമദാനിലെ ഈ സ്നേഹവിരുന്നിന് പിന്നിൽ മൂന്ന് പതിറ്റാണ്ടിൻ്റെ ചരിത്രം

പ്രാര്‍ഥനയ്ക്ക് തുല്യം അന്നദാനം എന്ന ആശയത്തോടെ 1990 ല്‍ തുടക്കമിട്ട കാരുണ്യപ്രവത്തന സംരംഭത്തില്‍, ആദ്യം അത്താഴവും പിന്നീട് നോമ്പ്തുറയും തുടങ്ങി. റമദാന്‍ നോമ്പ് കാലത്ത് വലിയൊരു തിരക്ക് തന്നെ കണ്ണൂര്‍ സിറ്റിയിലെ തെക്ക്യാവ് അത്താഴ കമ്മിറ്റിയിലുണ്ടാകാറുണ്ട്. തിരക്ക് നിയന്ത്രിക്കാൻ ടോക്കണ്‍ അടിസ്ഥാനത്തിലാണ് ഭക്ഷണം വിതരണം ചെയ്യുന്നത്. ഉച്ചതിരിഞ്ഞ് രണ്ട് മുതല്‍ വൈകിട്ട് 5.30 വരെയാണ് ടോക്കണ്‍ നല്‍കുക. എന്നാല്‍ ടോക്കണ്‍ ഇല്ലാത്തതിൻ്റെ പേരില്‍ ആര്‍ക്കും ഇവിടെ നിന്ന് ഭക്ഷണമില്ലാതെ മടങ്ങേണ്ടി വരില്ല. ആളുകള്‍ കൂടിയാല്‍ ഉടന്‍ തന്നെ വീണ്ടും ഭക്ഷണം പാകം ചെയ്ത് നല്‍കാനുള്ള സംവിധാനവുമുണ്ട്.

ആ കാലത്ത്, അറക്കല്‍ ആദിരാജ നല്‍കിയ കെട്ടിടത്തിലാണ് അത്താഴ കമ്മിറ്റിയുടെ പ്രവര്‍ത്തനം നടക്കുന്നത്. ഇഫ്താറിന് നെയ്‌ച്ചോര്‍, കോഴിയിറച്ചി, ബീഫ് ബിരിയാണി, മന്തി, പൊറോട്ട, വെള്ളയപ്പം, ഇടിയപ്പം തുടങ്ങിയ വിഭവങ്ങളും അത്താഴത്തിന് ചോറ്, അരിപ്പത്തല്‍, നെയ്‌ച്ചോര്‍, മീന്‍ എന്നിവയുമാണ് ഒരുക്കുന്നത്.