'വിഴിഞ്ഞം പദ്ധതിയുടെ വരുംവരായ്കകൾ ആലോചിക്കാതെ വേഗം നടപ്പാക്കാൻ സമരം ചെയ്‌തവരാണ്‌ ഇന്നത്തെ സമരക്കാർ': തോമസ് ഐസക്

തിരുവനന്തപുരം: വിഴിഞ്ഞം പദ്ധതിയുടെ വരുംവരായ്കകൾ നോക്കാതെ വേഗം നടപ്പാക്കാൻ സമരം ചെയ്തവരാണ് ഇന്നത്തെ സമരക്കാരെന്ന് മുൻ ധനമന്ത്രി തോമസ് ഐസക്. ഉമ്മൻചാണ്ടി സർക്കാർ അദാനി ഗ്രൂപ്പുമായി ഉണ്ടാക്കിയ കരാർ നടപ്പാക്കാൻവേണ്ടി ലത്തീൻ സഭ സമരം ചെയ്തതിനെ ഓർമ്മിപ്പിച്ചാണ് തോമസ് ഐസക് രംഗത്തെത്തിയത്. ഫേസ്ബുക്ക് പോസ്റ്റിലൂടെയാണ് അദ്ദേഹം ഇക്കാര്യം ചൂണ്ടിക്കാട്ടിയത്. ഉമ്മൻചാണ്ടിയുടെ കരാർ തികച്ചും ഏകപക്ഷികമായിരുന്നുവെന്ന് തോമസ് ഐസക് പറഞ്ഞു. ചെറിയൊരു തുകയൊഴികെ ബാക്കി ചെലവെല്ലാം കേരള സർക്കാരിന്റെ ചുമലിലായിരിക്കുമ്പോൾ കരാർ കാലയളവിൽ നേട്ടം മുഴുവൻ നടത്തിപ്പുകാരായ അദാനി കമ്പനിയ്‌ക്ക്‌ ലഭിക്കും. ഈ കരാർ വേഗം നടപ്പാക്കണമെന്ന് പറഞ്ഞാണ് അന്ന് ലത്തീൻ സഭ സമരം ചെയ്തത്. ഇപ്പോൾ പദ്ധതിയുടെ നല്ലൊരു പങ്ക്‌ തീർന്ന്‌, അടുത്ത ഏതാനും മാസങ്ങൾക്കുള്ളിൽ ആദ്യ കപ്പൽ വിഴിഞ്ഞത്‌ അടുപ്പിക്കാൻ കഴിയുമെന്ന സ്ഥിതിയായപ്പോഴാണ് ലത്തീൻ സഭ പദ്ധതിക്കെതിരെ പ്രക്ഷോഭം നടത്തുന്നതെന്നും തോമസ് ഐസക് ചൂണ്ടിക്കാട്ടി.