നെയ്യാറ്റിൻകര ആത്മഹത്യ: മരിച്ച രാജനെതിരെ ആത്മഹത്യയ്ക്ക് കേസെടുത്ത് പൊലീസ്

തിരുവനന്തപുരം: നെയ്യാറ്റിൻകരയിൽ ദമ്പതികൾ ആത്മഹത്യ ചെയ്ത സംഭവത്തിൽ ആത്മഹത്യയ്ക്കും കോടതി ഉദ്യോഗസ്ഥരുടെ ജോലി തടസ്സപ്പെടുത്തിയതിനും കേസെടുത്ത് പൊലീസ്. മരിച്ച രാജനെതിരെയാണ് നെയ്യാറ്റിൻകര പൊലീസ് സ്വമേധയാ കേസ് രജിസ്റ്റർ ചെയ്തിരിക്കുന്നത്. അഭിഭാഷക കമ്മീഷന്‍റെ മൊഴിയുടെ അടിസ്ഥാനത്തിലാണ് ജോലി തടസ്സപ്പെടുത്തിയതിന് കേസ്. രണ്ട് കുറ്റങ്ങൾക്കും കൂടി ഒറ്റ എഫ്ഐആറാണ് രജിസ്റ്റർ ചെയ്തിരിക്കുന്നത്. അതേസമയം സംഭവത്തിൽ പൊലീസുകാരുടെ പക്കൽ നിന്നും വീഴ്ചയുണ്ടായിട്ടുണ്ടോ എന്നറിയുന്നതിന് അന്വേഷണം തുടങ്ങിയതായി റൂറൽ എസ്പി അറിയിച്ചിട്ടുണ്ട്.