ലോക്ക്ഡൗൺ വിരസത മാറ്റാൻ ഫോട്ടോ മത്സരം; DYFI യുടെ ഫെയ്സ്ബുക്ക് പേജിൽ ടിപി വധക്കേസ് പ്രതിയുടെ ഫോട്ടോ

ലോക്ക്ഡൗൺ വിരസത മാറ്റുന്നതിനുള്ള പരിപാടിയുടെ ഭാഗമായാണ് ഡിവൈഎഫ്ഐ പെരിങ്ങത്തുർ മേഖല കമ്മിറ്റി അച്ഛനോടൊപ്പം എന്ന പേരിൽ ഫോട്ടോ മത്സരം സംഘടിപ്പിക്കുന്നത്. മെയ് ഒന്നിനാണ് മത്സരം ആരംഭിച്ചത്. മത്സരിക്കുന്നവർ അച്ഛനൊപ്പം നിൽക്കുന്ന ഫോട്ടൊ എടുത്ത് ഡിവൈഎഫ്ഐ നേതാക്കളുടെ വാട്സ് ആപ്പ് നമ്പറിലേക്ക് അയച്ച് കൊടുക്കുകയാണ് വേണ്ടത് .ഈ മാസം പതിനഞ്ച് വരെയാണ് മത്സരം.

വാട്സാപ്പ് വഴി ലഭിക്കുന്ന ഫോട്ടോകൾ പെരിങ്ങത്തൂർ മേഖല കമ്മിറ്റിയുടെ പേജിൽ പോസ്റ്റ് ചെയ്യും. ഏറ്റവും കൂടുതൽ ലൈക്കും കമൻറും ലഭിക്കുന്നവർ വിജയികളാവും. മത്സരത്തിന്റെ ഭാഗമായി ആദ്യ ദിവസം പ്രദർശിപ്പിച്ച ഫോട്ടോ മുഹമ്മദ് ഷാഫിയുടെതാണ്.

ഈ ഫോട്ടോയ്ക്ക് ആയിരത്തിലധികം ആളുകൾ കമന്റ് ചെയ്യുകയും രണ്ടായിരത്തിൽ അധികം പേർ ലൈക്കും ചെയ്തു. കൊലയാളികളെ മഹത്വവത്കരിക്കാനുള്ള ശ്രമമാണ് ഇതിലൂടെ നടക്കുന്നതെന്നാണ് ടിപിയുടെ ഭാര്യയും ആർഎംപി നേതാവുമായ കെ. കെ. രമ ഉൾപ്പെടെയുള്ളവരുടെ വിമർശനം.