മാനസികാരോ​ഗ്യ പ്രശ്നങ്ങളുള്ള സ്ത്രീകൾക്ക് ഗര്‍ഭാശയമുഖ കാൻസർ വരാനുള്ള സാധ്യത ഇരട്ടിയെന്ന് പഠനം

” ഗര്‍ഭാശയമുഖ കാൻസറിനെ പ്രതിരോധിക്കുന്നതിൽ വിജയിക്കണമെങ്കിൽ കൂടുതൽ ശ്രദ്ധ ആവശ്യനമാണെന്ന് കരോലിൻസ്ക ഇൻസ്റ്റിറ്റ്യൂട്ടിലെ ഇൻസ്റ്റിറ്റ്യൂട്ട് ഓഫ് എൻവയോൺമെന്റൽ മെഡിസിനിലെ ഗവേഷകനായ കെജിയ ഹു പറയുന്നു. ഒരു സ്ത്രീയുടെ യോനിയിൽ നിന്ന് ഗർഭപാത്രത്തിലേക്ക് പ്രവേശിക്കുന്ന സ്ഥലത്താണ് (cervix) ഈ അർബുദം ഉണ്ടാകുന്നത്.

സെർവിക്കൽ കാൻസർ കേസുകളിൽ 99 ശതമാനവും ലൈംഗിക സമ്പർക്കത്തിലൂടെ പകരുന്നതാണെന്നും ഹൈ റിസ്ക് ഹ്യൂമൻ പാപ്പിലോമ വൈറസ് (HPV) അണുബാധയുമായി ബന്ധപ്പെട്ടിരിക്കുന്നു എന്നും ലോകാരോ​ഗ്യ സംഘടന പറയുന്നു. സ്ത്രീകളിൽ ഏറ്റവും കൂടുതലായി കാണപ്പെടുന്ന നാലാമത്തെ കാൻസറാണ് ​ഗർഭാശയ മുഖ കാൻസർ അഥവാ സെർവിക്കൽ കാൻസർ. 2018-ൽ, ലോകമെമ്പാടുമുള്ള 570,000 സ്ത്രീകൾക്ക് സെർവിക്കൽ കാൻസർ ഉണ്ടെന്ന് കണ്ടെത്തിയിരുന്നു. ഏകദേശം 311 000 സ്ത്രീകൾ ഈ രോഗം മൂലം മരിച്ചിട്ടുണ്ട്.

​ഗർഭാശയമുഖ കാൻസറിനെതിരെ പ്രതിരോധ നടപടികൾ സ്വീകരിക്കേണ്ടതിന്റെ ആവശ്യകതയും ​ഗവേഷകർ ചൂണ്ടിക്കാട്ടി. 1940 നും 1995 നും ഇടയിൽ ജനിച്ച നാല് ദശലക്ഷത്തിലധികം സ്ത്രീകളിലാണ് പഠനം നടത്തിയത്. മാനസികാരോ​ഗ്യ പ്രശ്നങ്ങൾ, ന്യൂറോ സൈക്യാട്രിക് രോ​ഗങ്ങൾ ലഹരിവസ്തുക്കളുടെ ഉപയോഗം എന്നിവയുള്ള സ്ത്രീകളെ ഇത്തരം രോ​ഗങ്ങൾ ഇല്ലാത്തവരുമായി ഗവേഷകർ താരതമ്യം ചെയ്തു. ഈ രോഗം പിടിപെടാൻ സാധ്യതയുള്ള സ്ത്രീകൾ സ്ക്രീനിംഗ് പ്രോഗ്രാമുകളിൽ അപൂർവ്വമായേ പങ്കെടുക്കുന്നുള്ളൂ എന്ന കാര്യവും ​ഗവേഷകർ ചൂണ്ടിക്കാട്ടി.

മയക്കുമരുന്ന് ഉപയോ​ഗിക്കുന്ന സ്ത്രീകളിലാണ് ഏറ്റവും വലിയ അപകടസാധ്യതയെന്നും ​ഗ​ഗേഷകർ പറഞ്ഞു. മാനസികാരോ​ഗ്യ പ്രശ്നങ്ങളുള്ള സ്ത്രീകൾ പതിവായി ഗൈനക്കോളജിക്കൽ സ്ക്രീനിംഗിന് വിധേയരാകണമെന്നും ഇത് കാൻസർ വരാനുള്ള സാധ്യത കുറയ്ക്കുമെന്നും ഇവർ പറഞ്ഞു. അതേസമയം, ​ഗർഭാശയമുഖ കാൻസറിന് കാരണമായേക്കാവുന്ന പുകവലി, ഹോർമോൺ ഗർഭനിരോധന മാർ​ഗങ്ങൾ, ലൈംഗികമായി പകരുന്ന രോഗങ്ങൾ തുടങ്ങിയവയെക്കുറിച്ചൊന്നും പഠനത്തിൽ പരാമർശിക്കുന്നില്ല.