World Homeopathy Day 2021| ഇന്ന് ലോക ഹോമിയോപ്പതി ദിനം: ഹോമിയോപ്പതിയെക്കുറിച്ച് അഞ്ച് കാര്യങ്ങൾ

ഈ ദിവസം ആചരിക്കുന്നതിലൂടെ ഹോമിയോപ്പതി സംബന്ധിച്ച അവബോധം ആളുകളിൽ വർദ്ധിപ്പിക്കാനും ഹോമിയോപ്പതിയുടെ വിജയ നിരക്ക് മെച്ചപ്പെടുത്തുന്നതിനായുള്ള പ്രവർത്തനങ്ങളുമാണ് ലക്ഷ്യമിടുന്നത്. 2021ലെ ലോക ഹോമിയോപ്പതി ദിനത്തിൽ, ഹോമിയോ മരുന്നുകളെക്കുറിച്ച് നിങ്ങൾ തീർച്ചയായും അറിയേണ്ട അഞ്ച് കാര്യങ്ങൾ ഇതാ.

രോഗിയുടെ സ്വന്തം ശരീരത്തിലെ പ്രതിരോധ പ്രതികരണങ്ങൾ പ്രവർത്തനക്ഷമം ആക്കുന്നതിലൂടെയാണ് ഹോമിയോപ്പതി ചികിത്സ നടത്തുന്നത്. സാധാരണയായുള്ള വൈദ്യശാസ്ത്രത്തിന്റെ ബദൽ വിഭാഗങ്ങളിൽ ഒന്നാണ് ഹോമിയോപ്പതി. ഏത് രോഗത്തിനെയും ഹോമിയോപ്പതി വഴി ഭേദമാക്കാനാകുമെന്നാണ് വിശ്വസിക്കുന്നത്. ലോക ഹോമിയോപ്പതി ദിനാചരണത്തിന്റെ പ്രാഥമിക മുദ്രാവാക്യം തന്നെ ഹോമിയോപ്പതി വികസിപ്പിക്കുന്നതിനുള്ള വെല്ലുവിളികളും തടസങ്ങളും നീക്കുക എന്നതാണ്. ആഗോളതലത്തിൽ ഏറ്റവും വലിയ ഹോമിയോ മരുന്ന് നിർമാതാക്കളും വ്യാപാരികളുമാണ് ഇന്ത്യ. ഇന്ത്യയിൽ, ഹോമിയോപ്പതി ആയുർവേദം പോലെ തന്നെ ജനപ്രിയമാണ്. ഇവ രണ്ടും ആയുഷ് മന്ത്രാലയത്തിന്റെ പരിധിയിലാണ് വരുന്നത്.

ഹോമിയോ മരുന്നുകൾ അതിവേഗം പ്രവർത്തിക്കുകയും ദീർഘകാലം നിലനിൽക്കുകയും ചെയ്യും. രോഗം അതിന്റെ വേരുകളിൽ നിന്ന് ഉന്മൂലനം ചെയ്യാൻ ഹോമിയോ മരുന്ന് സഹായിക്കും. രോഗശാന്തിക്കായി എടുക്കുന്ന സമയം രോഗത്തിന്റെ വിട്ടുമാറാത്ത അവസ്ഥയെ ആശ്രയിച്ചിരിക്കും.

ഹോമിയോ മരുന്നുകൾ പ്രകൃതിദത്ത പദാർത്ഥങ്ങളിൽ നിന്നാണ് തയ്യാറാക്കുന്നത്. കൂടാതെ, ഹോമിയോ മരുന്നുകളിൽ സ്റ്റിറോയിഡുകൾ ഇല്ല.

പനി, ജലദോഷം, ചുമ, ന്യുമോണിയ, വയറിളക്കം, മൈഗ്രെയ്ൻ, പരിക്കുകൾ തുടങ്ങിയ അവസ്ഥകളിൽ ഹോമിയോപ്പതി പെട്ടെന്ന് ആശ്വാസം നൽകും.

ലാക്ടോസ് എന്ന പഞ്ചസാര ഉപയോഗിച്ചാണ് ഹോമിയോ മരുന്നുകൾ നിർമ്മിക്കുന്നത്. ഒരാഴ്ച കഴിക്കാനുള്ള ഹോമിയോ മരുന്നുകളിലെ പഞ്ചസാരയുടെ അളവ് ഒരു ടീസ്പൂണിൽ കൂടുതലില്ല. അതിനാൽ അവ പ്രമേഹ രോഗികൾക്ക് ദോഷകരമല്ല.

ആയുഷ് മന്ത്രാലയത്തിന് കീഴിലുള്ള സ്വയംഭരണ സ്ഥാപനമായ സെൻട്രൽ കൗൺസിൽ ഫോർ റിസർച്ച് ഇൻ ഹോമിയോപ്പതി (സി സി ആർ എച്ച്) ഏപ്രിൽ 10, 11 തീയതികളിൽ ന്യൂഡൽഹിയിലെ വിജ്യാൻ ഭവനിൽ രണ്ട് ദിവസത്തെ സമ്മേളനം സംഘടിപ്പിക്കും. 2021ലെ ലോക ഹോമിയോപ്പതി ദിനത്തിൽ, ആരോഗ്യപരമായ പല പ്രശ്‌നങ്ങൾക്കും പരിഹാരം നൽകാൻ സഹായിക്കുന്ന ഈ സുരക്ഷിത മരുന്നിനെക്കുറിച്ച് കൂടുതൽ അറിയാൻ ശ്രമിക്കാം.