'ആ റിബൺ കത്രിക കൊണ്ട് ഞറിക്കി അതാണ് ചെയ്തത്'; റെയിൽവേ ഡൈനിം​ഗ് റൂം ഉദ്ഘാടനം ചെയ്ത ശുചീകരണത്തൊഴിലാളി

'ഇവിടെ ഇങ്ങനെ ഒരു റിബൺ വച്ചിരുന്നു, അത് ഞാൻ കത്രിക കൊണ്ട് ഞറിക്കി, അതാണ് ചെയ്തത്'. ഇത് പറയുമ്പോൾ എറണാകുളം സൗത്ത് റെയില്‍വേ സ്റ്റേഷനിലെ സീനിയർ ക്ലീനിംഗ് സ്റ്റാഫായ തങ്കമ്മയുടെ മുഖത്ത് ആത്മവിശ്വാസത്തിന്റെയും സന്തോഷത്തിന്റെയും പുഞ്ചിരി വിടരുന്നത് കാണാം. എന്നും യൂണിഫോം ധരിച്ച് സ്റ്റേഷനില്‍ എത്തുന്ന തങ്കമ്മ കഴിഞ്ഞ വെള്ളിയാഴ്ച എത്തിയത് കൈയിൽ സെറ്റ് സാരിയുമായാണ്. തുടർന്ന് എറണാകുളം സൗത്ത് റെയില്‍വേ സ്റ്റേഷനിൽ പുതിയതായി ആരംഭിച്ച ഡൈനിംഗ് ഹാളിന്‍റെ ഉദ്ഘാടനം നിർവഹിക്കുകയായിരുന്നു. ഇതോടെ ആ ഉദ്ഘാടനം അപൂർവ്വ ചടങ്ങായി മാറി.