Delhi Metro | യാത്രയും ചെയ്യാം, പുസ്തകവും വായിക്കാം; ഡൽഹി മെട്രോ യാത്രക്കാർക്ക് പുസ്തകം വായിക്കാൻ അവസരമൊരുക്കി യുവതി

പുസ്തകങ്ങളോടുള്ള തന്റെ പ്രണയം ഡല്‍ഹി(Delhi) സ്വദേശിനിയായ ശ്രുതി ശര്‍മ്മയെ എക്കാലത്തും വേറിട്ട വഴികളിലൂടെ ചിന്തിക്കാന്‍ പ്രേരിപ്പിച്ചിട്ടുണ്ട്. പുസ്തകവായനയുടെ ലോകത്തിലേക്ക് എല്ലാവരെയും എത്തിക്കണമെന്ന ആഗ്രഹവും ശ്രുതിയ്ക്കുണ്ട്. ഇത്തവണ തന്റെ മനസിലുദിച്ച ആശയം പ്രാവര്‍ത്തികമാക്കാന്‍ എന്നും തനിക്ക് ആശ്രയമായ ഡല്‍ഹി മെട്രോ(Delhi Metro) തന്നെ തിരഞ്ഞെടുത്തിരിക്കുകയാണ് ശ്രുതി. ബ്രിട്ടീഷ് അഭിനേത്രിയായ എമ്മാ വാട്സണാണ് ശ്രുതിയ്ക്ക് പ്രചോദനമായിരിക്കുന്നതെന്ന് ദി ന്യൂ ഇന്ത്യന്‍ എക്സ്പ്രസ് റിപ്പോര്‍ട്ട് ചെയ്യുന്നു. അവരാണ് പൊതുജനങ്ങള്‍ക്കിടയിലെ വായനക്കാരെ പ്രോത്സാഹിപ്പിക്കാന്‍ ന്യൂയോര്‍ക്കിലെയും ലണ്ടനിലെയും സബ്വേകളിലും പാരീസിലെ തെരുവുകളിലും പുസ്തകങ്ങള്‍ ലഭ്യമാക്കുന്ന പദ്ധതിയ്ക്ക് തുടക്കമിട്ടത്. അതുപോലൊരു സംരംഭം ഡല്‍ഹി മെട്രോയില്‍ നടത്താനാണ് ശ്രുതിയുടെ ശ്രമം.