'ചരിത്രം ആവര്‍ത്തിക്കുമോ?'; അന്ന് തിരുവനന്തപുരത്ത് ഇരുവരും ഏറ്റുമുട്ടിയപ്പോഴും ടോസ് തുണച്ചത് വിന്‍ഡീസിനെ

1988 ജനുവരി 25 നായിരുന്നു ഇന്ത്യയും വിന്‍ഡീസും തിരുവനന്തപുരം യൂണിവേഴ്‌സിറ്റി സ്റ്റേഡിയത്തില്‍ ഏറ്റുമുട്ടിയത്. വിവിയന്‍ റിച്ചാര്‍ഡ്‌സ് നയിച്ച വെസ്റ്റ് ഇന്‍ഡീസിനോട് ഏറ്റമുട്ടിയത് ഇന്ത്യയുടെ നിലവിലെ പരിശീലകന്‍ രവി ശാസ്ത്രിയുടെ കീഴിലുള്ള ഇന്ത്യന്‍ ടീമും. അന്നും ടോസ് ഭാഗ്യം തുണച്ചത് കരീബിയന്‍ നായകനെയായിരുന്നു. എന്നാല്‍ ടോസ് ലഭിച്ച റിച്ചാര്‍ഡ്‌സ് ഫീല്‍ഡിങ്ങാണ് അന്ന് തെരഞ്ഞെടുത്തത്. ഇന്ന് ടോസ് ലഭിച്ച ഹോള്‍ഡര്‍ തെരഞ്ഞെടുത്തത് ബാറ്റിങ്ങും.

കൃഷ്ണമാചാരി ശ്രീകാന്തിന്റെ സെഞ്ച്വറിയുടെയും അമര്‍നാഥിന്റെ അര്‍ദ്ധ സെഞ്ച്വറിയുടെയും പിന്‍ബലത്തില്‍ ഭേദപ്പെട്ട സ്‌കോര്‍ പടുത്തുയര്‍ത്തിയി്ടും ഇന്ത്യ പരാജയപ്പെടുകയും ചെയ്തു. ശ്രീകാന്ത് 106 പന്തുകളില്‍ നിന്ന് 10 ഫോറിന്റെയും മൂന്ന് സിക്സിന്റെയും അകമ്പടിയോടെ 101 റണ്‍സായിരുന്നു നേടിയത്. അമര്‍നാഥ് 87 പന്തുകളില്‍ നിന്ന് 56 റണ്‍സും അസ്ഹറുദ്ദീന്‍ 33 പന്തുകളില്‍ നിന്ന് 36 റണ്‍സും നേടി. 45 ഓവറായി ചുരുക്കിയിരുന്ന മത്സരത്തില്‍ 8 വിക്കറ്റ് നഷ്ടത്തില്‍ 239 റണ്‍സായിരുന്നു ഇന്ത്യ കുറിച്ചത്. വിന്‍ഡീസ് നിരയില്‍ പാറ്റേഴ്സണ്‍ മൂന്ന് വിക്കറ്റും വിവിയന്‍ റിച്ചാര്‍ഡ്സണ്‍ രണ്ട് വിക്കറ്റും നേടി.

മറുപടി ബാറ്റിങ്ങിനിറങ്ങിയ വിന്‍ഡീസ് ഓപ്പണര്‍മാര്‍ തുടക്കത്തില്‍ തന്നെ ഇന്ത്യയെ ചിത്രത്തില്‍ നിന്നും മായ്ച്ച് കളയുകയായിരുന്നു. 164 റണ്‍സായിരുന്നു ഓപ്പണര്‍മാര്‍ ചേര്‍ന്ന് സ്‌കോര്‍ബോര്‍ഡില്‍ ചേര്‍ത്തത്. 84 റണ്‍സെടുത്ത ഗ്രീനിഡ്ജായിരുന്നു മത്സരത്തില്‍ പുറത്തായ ഏക വെസ്റ്റ് ഇന്‍ഡീസ് താരം. മനീന്ദര്‍ സിങ്ങിനായിരുന്നു വിക്കറ്റ്.

എന്നാല്‍ കാര്യവട്ടം ഏകദിനത്തില്‍ വിന്‍ഡീസിന് തുടക്കില്‍ തന്നെ രണ്ട് വിക്കറ്റുകള്‍ നഷ്ടമായിരിക്കുകാണ്. ഷയി ഹോപ്പിനെയും കീറണ്‍ പവലിനെയുമാണ് വിന്‍ഡീസിന് നഷ്ടമായത്.