'നാണക്കേട്'; സീനിയര്‍ താരങ്ങളെയോര്‍ത്ത് ലജ്ജിക്കുന്നെന്ന് കാള്‍ ഹൂപ്പര്‍

നേരത്തെ ഇന്ത്യക്കെതിരായ ഏകദിന ടീമിനെ പ്രഖ്യാപിക്കുമ്പോള്‍ തന്നെ ടീമിലേക്ക് പരിഗണിക്കേണ്ടതില്ലെന്ന് സൂപ്പര്‍ താരം ക്രിസ് ഗെയ്ല്‍ പറഞ്ഞിരുന്നു. ഓപ്പണര്‍ എവിന്‍ ലെവിസ് വ്യക്തിപരമായ കാരണങ്ങളാല്‍ വിട്ട് നിന്നതിനു പിന്നാലെയായിരുന്നു ഗെയ്‌ലിന്റെയും മടക്കം. ദേശീയ ജഴ്‌സിയില്‍ കളിക്കാന്‍ താരങ്ങള്‍ക്ക് താല്‍പര്യമില്ലാത്തത് ലജ്ജാകരമാണെന്ന് ഹൂപ്പര്‍ അഭിപ്രായപ്പെട്ടു.

ഗെയ്‌ലിനു പുറമേ സുനില്‍ നരെയ്ന്‍, ആന്ദ്രെ റസ്സല്‍ തുടങ്ങിയവരും നിലവില്‍ ദേശീയ ടീമില്‍ കളിക്കുന്നില്ല. 'സീനിയര്‍ താരങ്ങള്‍ക്ക് ദേശീയ ടീമില്‍ കളിക്കാന്‍ താല്‍പ്പര്യമില്ലാത്തത് നാണക്കേടാണ്. എന്ത് കൊണ്ടാണ് അവര്‍ ടീമിനായ് കളിക്കാത്തതെന്ന് എനിക്കറിയില്ല. പക്ഷേ അവര്‍ക്ക് താല്‍പ്പര്യം ഇല്ലെന്ന കാര്യം വ്യക്തമാണ്.' ഹൂപ്പര്‍ പറഞ്ഞു.

നേരത്തെ ടെസ്റ്റ് പരമ്പര 2- 0 ത്തിനും ഏകദിന പരമ്പര 3- 1 നും പരാജയപ്പെട്ട വിന്‍ഡീസ് ടി 20 യിലെ ആദ്യ മത്സരവും തോറ്റിരുന്നു. ആദ്യ ടി 20യില്‍ മൂന്ന് താരങ്ങളായിരുന്നു അരങ്ങേറിയത്. ഇന്ത്യന്‍ ബൗളിങ്ങിനു മുന്നില്‍ തകര്‍ന്ന വിന്‍ഡീസ് നിരയ്ക്ക് എട്ടു വിക്കറ്റ് നഷ്ടത്തില്‍ 109 റണ്‍സേ നേടാനേ കഴിഞ്ഞിരുന്നുള്ളു. അഞ്ച് വിക്കറ്റിനായിരുന്നു മത്സരത്തിലെ ഇന്ത്യന്‍ ജയം.