പീഡിപ്പിച്ചയാൾക്ക് പത്തുവയസുകാരിയെ വിവാഹം ചെയ്തു കൊടുത്തു; ആറ് മാസത്തിനു ശേഷം മുത്തലാഖ്

മുസഫർനഗർ: പീഡിപ്പിച്ചയാൾക്ക് വിവാഹം ചെയ്ത് കൊടുത്ത പത്ത് വയസുകാരിക്ക് ആറു മാസത്തിനു ശേഷം മുത്തലാഖ്. ഉത്തർപ്രദേശിലെ മുസഫർനഗറിലാണ് സംഭവം.

ആറ് മാസങ്ങൾക്ക് മുമ്പാണ് പത്ത് വയസുള്ള പെൺകുട്ടിയെ പീഡിപ്പിച്ചയാൾക്ക് തന്നെ വിവാഹം ചെയ്ത് കൊടുത്തത്.

ചൈൽഡ് കെയർ ഹെൽപ്പ് ലൈൻ പ്രതിനിധിയാണ് ഇക്കാര്യം അറിയിച്ചത്. കേസ് പൊലീസിനെ ഏൽപ്പിച്ചതായി ഹെൽപ്പ് ലൈൻ വ്യക്തമാക്കി.

ഓഗസ്റ്റ് 6 ന് ജില്ലയിലെ ബുദ്ധാന പൊലീസ് സ്റ്റേഷന് കീഴിലുള്ള ഒരു ഗ്രാമത്തിൽ ഹെൽപ്പ് ലൈനിൽ നിന്നുള്ള ഒരു സംഘം കൗൺസിലിംഗിനായി പെൺകുട്ടിയെ സന്ദർശിച്ചപ്പോഴാണ് സംഭവം പുറത്തറിയുന്നത്.

പെൺകുട്ടിയുടെ സഹോദരിയുടെ അളിയനാണ് പീഡനത്തിന് ഇരയാക്കിയത്. തുടർന്ന് ഫെബ്രുവരി 16 നാണ് ഇയാളെ വിവാഹം കഴിച്ചതെന്ന് പെൺകുട്ടി പറഞ്ഞതായി ഹെൽപ്പ് ലൈൻ അംഗം പുനം ശർമ പറഞ്ഞു.

ആഗസ്ത് 4 നാണ് ഷാംലി ജില്ലയിൽ താമസിക്കുന്ന പ്രതി പെൺകുട്ടിയെ മാതാപിതാക്കളുടെ വീട്ടില്‍ കൊണ്ടു വിട്ടത്. തുടർന്ന് ഇവർ ഹെൽപ്പ് ലൈനിനെ സമീപിക്കുകയായിരുന്നു.

ആരോപണങ്ങളെക്കുറിച്ച് അന്വേഷണം ആരംഭിച്ചതായും തുടർനടപടികൾക്കായി തിങ്കളാഴ്ച പ്രതിയെ വിളിപ്പിച്ചതായും ബുധാന എസ്എച്ച്ഒ കെ പി സിംഗ് പറഞ്ഞു.