Sea Cockroach | 14 കാലുള്ള ഭീമൻ ജീവി; കടലിലെ അപൂർവ ജീവിയെ കണ്ടെത്തി ഗവേഷകർ

ഹോളിവുഡ് സയൻസ് ഫിക്ഷൻ സിനിമകളിൽ കണ്ടിട്ടുള്ള അന്യഗ്രഹ ജീവികളുടേതിന് സമാനമാണ് പുതുതായി കണ്ടെത്തിയ ജീവി. സിങ്കപ്പൂരിലെ നാഷണൽ യൂണിവേഴ്സിറ്റിയുടെ മറൈൻ സർവേയ്ക്കിടയിലാണ് ഭീമൻ കടൽപാറ്റയെ കണ്ടെത്തിയത്.

14 ദിവസത്തെ ഗവേഷണത്തിനിടയിൽ 12,000 ഓളം അപൂർവയിനം കടൽ ജീവികളെയാണ് സംഘം കണ്ടെത്തിയത്. ആദ്യമായാണ് ഇത്തരമൊരു ജീവിയെ കടലിൽ നിന്നും കണ്ടെത്തുന്നത്. പുതുതായി കണ്ടെത്തിയ ജീവിക്ക് ബാത്തിനോമസ് റക്സസ (Bathynomus raksasa) എന്നാണ് ഗവേഷകർ പേരിട്ടിരിക്കുന്നത്.

പാറ്റയുടെ വർഗത്തിൽ പെട്ട ജീവിയാണെങ്കിലും പാറ്റയെ പോലെ നിസ്സാരക്കാരനല്ല പുതിയ ആൾ. ഇതിന്റെ ചിത്രങ്ങൾ സോഷ്യൽമീഡിയയിൽ വ്യാപകമായി പ്രചരിക്കുന്നുണ്ട്.

പാറ്റയോടാണ് സാദൃശ്യമെങ്കിലും ശാസ്ത്രീയമായി ഞണ്ട്, കൊഞ്ച് ജീവി വർഗത്തിലാണ് Bathynomus raksasa ഉൾപ്പെടുക. കരയിലെ പാറ്റകളെ പോലെ ഭക്ഷണമില്ലാതെ ദീർഘനാളുകൾ സഞ്ചരിക്കാൻ ഈ ജീവിക്ക് സാധിക്കും. ചത്ത കടൽ ജീവികളുടെ അവശിഷ്ടങ്ങൾക്കിടയിൽ ഭക്ഷണം കണ്ടെത്തി അവയ്ക്കിടയിൽ തന്നെയാണ് ഇവയുടെ വാസം.

20 ഇഞ്ചെങ്കിലും വലുപ്പമുണ്ട് ശരീരത്തിന്. ഇതുവരെ കണ്ടെത്തിയതിൽ വെച്ച് ഏറ്റവും വലിയ രണ്ടാമത്തെ ശ്ലേഷമോദരപ്രാണി (isopod) ആണിത്.

ഗവേഷണത്തിൽ വേറെയും അപൂർവ ജീവികളെ കണ്ടെത്തിയിട്ടുണ്ടെന്നാണ് ഗവേഷകർ പറയുന്നത്. 800 വ്യത്യസ്ത ജീവി വർഗങ്ങളെ കണ്ടെത്തിയതായി ഇവർ അവകാശപ്പെടുന്നു. ഇതിൽ ഇതുവരെ തിരിച്ചറിഞ്ഞിട്ടില്ലാത്ത ശാസ്ത്രം കണ്ടെത്താത്ത പന്ത്രണ്ടോളം ജീവികളുമുണ്ട്.