Covid 19| 'കോവിഡ് വന്നാൽ അനുബന്ധ രോഗങ്ങൾ നിയന്ത്രിക്കാൻ ശ്രദ്ധിക്കുക': ഡോ. ബി ഇക്ബാൽ

കോവിഡിന്റെ രണ്ടാം തരംഗത്തിൽ രോഗം ഗുരുതരമാവുന്നവരിലും മരണമടയുന്നവരിലും പ്രായം കുറഞ്ഞവരുടെ എണ്ണം വർധിച്ച് വരുന്നതായി കാണുന്നുണ്ട്. വയോജനങ്ങളിൽ ഭൂരിഭാഗം പേരും വാക്സിനേഷൻ സ്വീകരിച്ചതിനാൽ അവരുടെയിടയിൽ രോഗം മൂർച്ചിക്കുന്നവർ കുറഞ്ഞിട്ടുണ്ട്. പ്രമേഹം രക്താതിമർദ്ദം തുടങ്ങിയ അനുബന്ധ രോഗമുള്ളവരിലാണ് രോഗം ഗുരുതരമാവുന്നത്. ഇങ്ങനെയുള്ള മറ്റ് രോഗങ്ങളുള്ളവർ അവരെ ചികിത്സിക്കുന്ന ഡോക്റ്റർമാരെ ബന്ധപ്പെട്ട് ഉചിതമായ തുടർ ചികിത്സ ഉറപ്പാക്കേണ്ടതാണ്. രോഗം ബാധിച്ച് ഗാർഹിക പരിചരണത്തിൽ കഴിയുന്നവർ നിർബന്ധമായും തങ്ങളെ മുൻപ് തന്നെ ബാധിച്ചിട്ടുള്ള രോഗങ്ങൾ നിയന്ത്രിക്കാൻ പ്രത്യേകം ശ്രദ്ധിക്കേണ്ടതുണ്ട്. പ്രമേഹ രോഗികൾ രക്തത്തിലെ ഗ്ലൂക്കോസ് നിലയും രക്താതിമർദ്ദമുള്ളവർ രക്തസമ്മർദ്ദവും ആവർത്തിച്ച് പരിശോധിക്കേണ്ടിവരും. ഇതിലേക്കായി അടുത്തുള്ള ആശുപത്രിയുമായോ വാർഡ് തല കമ്മറ്റിയുമായോ ആശ പ്രവർത്തകരുമായോ ബന്ധപ്പെടാവുന്നതാണ്. അല്പം ശ്രദ്ധിച്ചാൽ രോഗമൂർച്ച മാത്രമല്ല മരണം വരെ തടയാനാവും എന്നറിഞ്ഞിരിക്കണം.

Also Read- Lockdown | കോവിഡ് വ്യാപനം; പശ്ചിമ ബംഗാളില്‍ രണ്ടാഴ്ചത്തേക്ക് ലോക്ഡൗണ്‍ പ്രഖ്യാപിച്ചു

കോവിഡ് നിയന്ത്രണ പ്രതിരോധ പ്രവർത്തനങ്ങൾക്ക് സമാന്തരമായി നടക്കുന്ന ശാസ്തീയ വിലയിരുത്തലുകളുടെയും പഠനങ്ങളുടെയും അടിസ്ഥാനത്തിൽ പല മുൻതീരുമാനങ്ങളും തിരുത്തേണ്ടിവരും. പുതിയവ സ്വീകരിക്കേണ്ടിവരും. പുതിയൊരു മഹാമാരിയെ അഭിമുഖീകരിക്കുമ്പോൾ അനിവാര്യമായും സ്വീകരിക്കേണ്ടിവരുന്ന ശാസ്തീയവും പ്രായോഗികവുമായ സമീപനമാണ് ലോകമെമ്പാടും പിന്തുടർന്ന് വരുന്നത്.