കർണാടകയിൽ ഐഎഎസ് ഉദ്യോഗസ്ഥയുടെ വീട്ടിൽ റെയ്ഡ്: ലക്ഷക്കണക്കിന് രൂപയുടെ സ്വർണ്ണം പിടിച്ചെടുത്തു

ഇൻഫോർമേഷൻ ആൻഡ് ബയോടെക്നോളജി വകുപ്പിലെ ഉദ്യോഗസ്ഥ കൂടിയായ സുധയുടെ വീട്ടിൽ നിന്നും സ്വർണ്ണത്തിന് പുറമെ പത്തുലക്ഷം രൂപയും ഒരു ആഢംബര വാഹനവും എസിബി പിടിച്ചെടുത്തിട്ടുണ്ട്. ബാംഗ്ലൂർ ഡെവലപ്മെന്‍റ് അതോറിറ്റിയിലെ മുൻ സ്പെഷൽ ലാൻഡ് അക്വസിഷൻ ഉദ്യോഗസ്ഥയായിരുന്നു സുധ. ഇവരുടെ വീട്ടിൽ നിന്നും സ്വർണ്ണാഭരണങ്ങളും സ്വർണ്ണ നാണയങ്ങളും കണ്ടെടുത്ത കാര്യം എസിബി ഉദ്യോഗസ്ഥര്‍ സ്ഥിരീകരിച്ചിട്ടുണ്ട്. ഇതിന് പുറമെ പ്രോപ്പർട്ടി രേഖകളും ബാങ്ക് അക്കൗണ്ട് വിവരങ്ങള്‍ അടങ്ങിയ രേഖകളും വിശദമായ അന്വേഷണത്തിനായി പിടിച്ചെടുത്തിട്ടുണ്ട്.

അഞ്ച് ബംഗ്ലാവുകൾ, സ്വർണ്ണം, കണക്കിപ്പെടാത്ത കാശ് എന്നിവയൊക്കെ ഇവരുടെ പക്കലുണ്ട്. അവരുടെ വരുമാനത്തിൽ നിന്ന് സമ്പാദിക്കാവുന്നതിനെക്കാൾ വളരെ കൂടുതലാണിതൊക്കെയെന്നും ഉദ്യോഗസ്ഥരെ ഉദ്ധരിച്ച് റിപ്പോർട്ടുകളുണ്ട്. എന്നാൽ ഇവരുടെ പക്കൽ നിന്ന് എത്ര രൂപയുടെ സ്വർണ്ണം പിടിച്ചെടുത്തുവെന്ന കൃത്യമായ കണക്ക് ഉദ്യോഗസ്ഥർ പുറത്തുവിട്ടിട്ടില്ല. അഴിമതി ആരോപണം ഉയർന്ന പശ്ചാത്തലത്തിലാണ് ഉദ്യോഗസ്ഥർ സുധയുടെ വീട്ടിൽ റെയ്ഡിനെത്തിയത്.

റെയ്ഡിന്‍റെ പശ്ചാത്തലത്തിൽ ഇവർക്കെതിരെ അഴിമതി നിരോധന നിയമ പ്രകാരം കേസും രജിസ്റ്റർ ചെയ്തിട്ടുണ്ട്.