മികച്ച ഭരണത്തിൽ കേരളം നമ്പർ വൺ തന്നെ; അവസാനം ഉത്തർപ്രദേശ്; കണ്ടെത്തൽ കസ്തൂരി രംഗൻ അധ്യക്ഷനായ സമിതിയുടേത്

ഇന്ത്യൻ സ്പേസ് റിസർച്ച് ഓർഗനൈസേഷൻ മുൻ ചെയർമാൻ കെ കസ്തൂരിരംഗൻ മേധാവിയായുള്ള നോൺ പ്രോഫിറ്റ് ഓർഗനൈസേഷനാണ് റിപ്പോർട്ട് ഇന്ന് പുറത്തുവിട്ടത്. സുസ്ഥിര വികസനത്തിന്റെ പശ്ചാത്തലത്തിൽ ഒരു സംയോജിത സൂചികയെ അടിസ്ഥാനമാക്കിയുള്ള ഭരണ പ്രകടനത്തിലാണ് സംസ്ഥാനങ്ങളെ റാങ്ക് ചെയ്തത്.

ഉത്തർപ്രദേശ്, ഒഡീഷ, ബീഹാർ എന്നിവയാണ് റാങ്കിംഗിൽ ഏറ്റവും പിന്നിൽ. അവർക്ക് യഥാക്രമം -1.461, -1.201, -1.158 പോയിന്റുകൾ ആണ് ലഭിച്ചത്.

ചെറിയ സംസ്ഥാനങ്ങളുടെ വിഭാഗത്തിൽ 1.745 പോയിന്റുമായി ഗോവ ഒന്നാം സ്ഥാനത്തും മേഘാലയ (0.797), ഹിമാചൽ പ്രദേശ് (0.725) എന്നീ സംസ്ഥാനങ്ങൾ യഥാക്രമം രണ്ടും മൂന്നും സ്ഥാനത്തുമാണ്. പി‌എസി റിപ്പോർട്ടിൽ മണിപ്പൂർ (-0.363), ദില്ലി (-0.289), ഉത്തരാഖണ്ഡ് (-0.277) എന്നിവയാണ് നെഗറ്റീവ് പോയിന്റുകൾ നേടിയത്.

കേന്ദ്രഭരണ പ്രദേശങ്ങളുടെ വിഭാഗത്തിൽ മികച്ച ഭരണമുള്ള കേന്ദ്രഭരണ പ്രദേശമായി ചണ്ഡിഗഡ് തിരഞ്ഞെടുക്കപ്പെട്ടു. പുതുച്ചേരി (0.52), ലക്ഷദ്വീപ് (0.003) എന്നീ കേന്ദ്രഭരണ പ്രദേശങ്ങളാണ് തൊട്ടുപിന്നിൽ. ദാദർ ആൻഡ് നഗർ ഹവേലി (-0.69), ആൻഡമാൻ, ജമ്മു കശ്മീർ (-0.50), നിക്കോബാർ (-0.30) എന്നീ കേന്ദ്രഭരണ പ്രദേശങ്ങളുടേതാണ് ഏറ്റവും മോശം പ്രകടനം.

ഇക്വിറ്റി, വളർച്ച, സുസ്ഥിരത എന്നീ മൂന്ന് കാര്യങ്ങൾ അടിസ്ഥാനമാക്കി നിർവചിക്കപ്പെട്ട സുസ്ഥിര വികസനത്തിന്റെ പശ്ചാത്തലത്തിലാണ് ഭരണ പ്രകടനം വിശകലനം ചെയ്യുന്നതെന്ന് പി എ സി വ്യക്തമാക്കി.