'കല്ലട ഇംപാക്ട്': സ്വകാര്യ ബസ് ഓപ്പറേറ്റർമാർക്ക് പുതിയ പ്രവർത്തന മാനദണ്ഡങ്ങളുമായി സർക്കാർ

തിരുവനന്തപുരം: സ്വകാര്യ ബസ് ഓപ്പറേറ്റര്‍മാര്‍ക്ക് പുതിയ പ്രവര്‍ത്തന മാനദണ്ഡങ്ങളുമായി സര്‍ക്കാര്‍. കല്ലട ബസ് ജീവനക്കാര്‍ യാത്രക്കാരനെ മര്‍ദ്ദിച്ചതിന്റെ പശ്ചാത്തലത്തിലാണ് ലൈസന്‍സ് നടപടിക്രമങ്ങള്‍ കര്‍ശനമാക്കിയത്. ഗതാഗത സെക്രട്ടറി കെ ആര്‍ ജ്യോതിലാല്‍ ഇതുസംബന്ധിച്ച സര്‍ക്കുലര്‍ പുറത്തിറക്കി. യാത്ര തുടങ്ങുന്നതിനു മുന്‍പ് ജീവനക്കാരുടെ പേരും ഫോണ്‍ നമ്പരും അടക്കമുള്ള വിശദാംശങ്ങള്‍ ബസില്‍ പ്രദര്‍ശിപ്പിക്കണം. ബസ് കടന്നുപോകുന്ന സ്ഥലം യാത്രക്കാര്‍ക്ക് മനസിലാക്കാനുള്ള തത്സമയ സംവിധാനം ബസില്‍ ഏര്‍പ്പെടുത്തണം. യാത്രക്കാരുടെ ലോഗ് ബുക്ക് ഏജന്‍സിയിലും ഓരോ യാത്രയിലുമുള്ള യാത്രക്കാരുടെ വിവരശേഖരണം ബസിലും ഉണ്ടായിരിക്കണം. ചരക്കുകടത്ത് ഉള്‍പ്പെടെയുള്ള നിയമവിരുദ്ധ നടപടികള്‍ക്ക് ബസ് ഉപയോഗിക്കരുതെന്നും ഉത്തരവിൽ പറയുന്നു.