VD Satheesan| മുന്നിൽ നിന്ന് പട നയിച്ചു; യുഡിഎഫിന്റെ തൃക്കാക്കരയിലെ ചരിത്ര വിജയത്തിൽ താരമായി വി ഡി സതീശൻ

കൊച്ചി: തൃക്കാക്കരയിലേത് കോൺഗ്രസ് പാർട്ടിയെ സംബന്ധിച്ചിടത്തോളം വെറും ഒരു ഉപതെരഞ്ഞെടുപ്പായിരുന്നില്ല, ജീവന്മരണ പോരാട്ടം തന്നെയായിരുന്നു. രഹസ്യമായെങ്കിലും നേതാക്കൾ ഇക്കാര്യം സമ്മതിക്കും. തൃക്കാക്കര കൂടി കൈവിട്ടിരുന്നില്ലെങ്കിൽ പിന്നെ എന്താകും സ്ഥിതിയെന്ന് ചിന്തിക്കുമ്പോൾ പോലും പലരുടെയും നെഞ്ചിടിക്കും. പരമ്പരാഗതമായ പാർട്ടി മണ്ഡലം, പി ടി തോമസ് എന്ന വികാരം, പി ടിയുടെ പ്രിയ പത്നി ഉമാ തോമസ് തുടങ്ങി അനുകൂല ഘടകങ്ങൾ നിരവധിയായിരുന്നെങ്കിലും മുഖ്യമന്ത്രിയും മന്ത്രിമാരും സംഘവും കാടിളക്കി നടത്തിയ പ്രചാരണം തങ്ങളുടെ അവസാന പ്രതീക്ഷയും തല്ലിക്കെടുത്തുമോ എന്ന് കോൺഗ്രസ് ക്യാംപിലെ പലരും ആശങ്കപ്പെട്ടിരുന്നു. എന്നാൽ ഫലം വന്നപ്പോൾ കോൺഗ്രസ് നേതാക്കളെ പോലും അമ്പരിപ്പിക്കുന്ന വമ്പൻ വിജയമാണ് ഉമാ തോമസ് നേടിയത്. കഴിഞ്ഞ പാർലമെന്റ് തെരഞ്ഞെടുപ്പിന് ശേഷം ഒരു ആഘോഷം പോലും കാണാത്ത തിരുവനന്തപുരത്തെ ഇന്ദിരാഭവനിൽ പോലും പടക്കം പൊട്ടിച്ച് കോൺഗ്രസുകാർ വിജയം ആഘോഷമാക്കിയപ്പോൾ തന്നെ അവരുടെ സന്തോഷം ഊഹിക്കാമല്ലോ?