ഭൂമിയും കടന്ന് റയ്യാന ബർണവി; സൗദിയിൽ നിന്നും ആദ്യ വനിതാ ബഹിരാകാശ സഞ്ചാരി

രാജ്യത്തെ ആദ്യ വനിതാ ബഹിരാകാശ സഞ്ചാരിയെ അന്താരാഷ്ട്ര ബഹിരാകാശ നിലയത്തിലേക്ക് അയക്കാനൊരുങ്ങി സൗദി അറേബ്യ. മുപ്പത്തിമൂന്നുകാരിയായി റയ്യാന ബർണവി (Rayyana Barnawi) എന്ന വനിതയാണ് ഈ അപൂർവനേട്ടം കൈവരിക്കാനൊരുങ്ങുന്നത്. ദൗത്യം പൂർത്തിയാകുന്നതോടെ ബഹിരാകാശത്തെത്തുന്ന ആദ്യ അറബ് വനിതയായി റയ്യാന ബർണവി മാറും. സൗദി അറേബ്യയിലെ ഫൈറ്റർ ജെറ്റ് പൈലറ്റായ അലി അൽ ഖർനിയും (Ali Al-Qarni) ബർണവിയോടൊപ്പം ഉണ്ടാകും. ബഹിരാകാശത്തെത്തുന്ന രണ്ടാമത്തെ സൗദി സ്വദേശി എന്ന നേട്ടമാകും അലി അൽ ഖർനിക്ക് സ്വന്തമാകുക. അന്താരാഷ്ട്ര ബഹിരാകാശ നിലയത്തിലേക്കുള്ള പത്തു ദിവസത്തെ ദൗത്യത്തിന്റെ ഭാഗമാകാനുള്ള തയ്യാറെടുപ്പിലാണ് ഇരുവരും. കഴിഞ്ഞ സെപ്തംബർ മാസമാണ് പരിശീലനം ആരംഭിച്ചത്. ദൗത്യം ഈ വർഷം തന്നെ ഉണ്ടാകുമെന്നാണ് റിപ്പോർട്ടുകൾ.