നാട്ടുകാരെ ഭീതിയിലാക്കി കുന്നംകുളത്തെ 'അജ്ഞാതരൂപം': അന്വേഷണം ആരംഭിച്ച് പൊലീസ്

പഴഞ്ഞി, പോർക്കുളം, അരുവായി, കാട്ടകാമ്പാൽ, പെങ്ങാമുക്ക്, കരിക്കാട്,വില്ലന്നൂര്‍, കാരുകുളം, അരുവായി, കൊങ്ങണ്ണൂര്‍, പട്ടിത്തടം തുടങ്ങി പലയിടങ്ങളിലും അജ്ഞാത രൂപത്തെ കണ്ടവരുണ്ട്. ചെറുപ്പക്കാരടക്കം കൂട്ടം കൂടി തപ്പിയിറങ്ങിയെങ്കിലും ഇതുവരെ പിടികൂടാനായിട്ടില്ല.

ഇരുട്ടിൽ രൂപം വ്യക്തമല്ലെങ്കിലും അസാമാന്യ വേഗതയിലാണ് മതിലുകളും പറമ്പുകളും ചാടിക്കടക്കുന്നതെന്നാണ് നാട്ടുകാർ പറയുന്നത്. വാതിലുകളിലും ജനലുകളിലും തട്ടി ശബ്ദമുണ്ടാക്കാറുണ്ടെന്ന് ചിലര്‍ പറയുന്നുണ്ട്. എന്നാൽ ഇതുവരെ ഈ അജ്ഞാതൻ ആരെയും ഉപദ്രവിച്ചതായി റിപ്പോർട്ടുകളില്ല. അതുപോലെ തന്നെ ഇതിനെ കണ്ടെന്ന് പറയുന്ന സ്ഥലങ്ങളിൽ മോഷണവും റിപ്പോർട്ട് ചെയ്തിട്ടില്ല. ആ സാഹചര്യത്തിൽ തന്നെ ഈ രൂപം എന്താണെന്ന് ആശങ്കയിലാണ് കുന്നംകുളം വാസികൾ.