Modi@8 | നരേന്ദ്രമോദി കാരിരുമ്പിൻെറ കരുത്തും ഇച്ഛാശക്തിയുള്ള മനുഷ്യൻ: യോഗി ആദിത്യനാഥ്

കഴിഞ്ഞ 22 വർഷമായി രാജ്യം മുഴുവൻ അദ്ദേഹത്തിൻെറ പ്രത്യയശാസ്ത്രവും പ്രവർത്തന ശൈലിയും രാഷ്ട്രനിർമ്മാണത്തിന് നൽകുന്ന സംഭാവനയും ഉറ്റുനോക്കുന്നുണ്ട്. ഗുജറാത്തിൻെറ മുഖ്യമന്ത്രിയായ അദ്ദേഹം ‘വൈബ്രൻറ് ഗുജറാത്തി’നെ സൃഷ്ടിച്ചു. ഗുജറാത്ത് മോഡൽ വികസനം മറ്റ് സംസ്ഥാനങ്ങളും ഇന്ന് മാതൃകയായി എടുക്കുകയാണ്.

ശുചിത്വവും വൃത്തിയും ഇന്ത്യയുടെ വികസനത്തിനുള്ള മന്ത്രമായി മാറുമെന്ന് ആരെങ്കിലും ചിന്തിച്ചിരുന്നോ? മഹാത്മാഗാന്ധിക്ക് ശേഷം മറ്റാ‍ർക്കും അങ്ങനെ ചിന്തിക്കാൻ സാധിച്ചിരുന്നില്ല. എന്നാൽ കഴിഞ്ഞ ഏഴ്-എട്ട് വർഷമായി രാജ്യം മുഴുവൻ അത് യാഥാർത്ഥ്യമാകുന്നത് കാണുകയാണ്. ദാരിദ്ര്യനി‍ർമ്മാർജ്ജനം എന്നത് എക്കാലത്തും വലിയ പ്രശ്നമായിരുന്നു. മുദ്രാവാക്യം വിളികൾ മാത്രം മുഴങ്ങുകയും പ്രവ‍ർത്തികൾ നടക്കാതിരിക്കുകയും ചെയ്യുന്ന കാലം മാറി. ദാരിദ്ര്യം തുടച്ച് നീക്കുന്ന പ്രവ‍ർത്തികൾക്കാണ് മോദി തുടക്കമിട്ടിരിക്കുന്നത്. 'ജാം ട്രിനിറ്റി'യിലൂടെ (‘JAM Trinity’) (അതായത് ജൻധൻ, ആധാർ, മൊബൈൽ എന്നിവയുടെ ട്രിപ്പിൾ കോമ്പിനേഷൻ) രാജ്യത്തെ അഴിമതിയിൽ നിന്ന് മുക്തമാക്കുകയാണ്. സ‍ർക്കാരിൻെറ സഹായങ്ങളും പദ്ധതികളും ഇന്ന് നേരിട്ട് ജനങ്ങളിലേക്ക് എത്തുന്നു. അതിൻെറ മാറ്റവും സുവ്യക്തമാണ്.

പഞ്ചാമൃതം, സുജലം സുഫലം, ചിരഞ്ജീവി, മാതൃ-വന്ദന, കന്യാ കളവാണി തുടങ്ങിയ പദ്ധതികൾ ഗുജറാത്തിൻെറ പുരോഗതിക്കായി മോദി തുടങ്ങിയവയാണ്. ഇവയെല്ലാം മറ്റ് പേരുകളിലായി ഇന്ന് രാജ്യത്തും നടപ്പിലാക്കുന്നുണ്ട്. മേക്ക് ഇൻ ഇന്ത്യ, ഡിജിറ്റൽ ഇന്ത്യ, സ്റ്റാർട്ടപ്പ് ഇന്ത്യ, സ്റ്റാൻഡപ്പ് ഇന്ത്യ, ബേട്ടി ബച്ചാവോ-ബേട്ടി പഠാവോ തുടങ്ങിയ പദ്ധതികൾ പുതിയ ഇന്ത്യ കെട്ടിപ്പടുക്കുന്നതിൽ നാഴികക്കല്ലുകളാണ്. നോട്ട് നിരോധനവും ജിഎസ്ടിയും സാമ്പത്തിക മേഖലയിലെ വിപ്ലവകരമായ തീരുമാനങ്ങളായിരുന്നു. നമ്മുടെ കടൽത്തീരം പുരോഗതിയുടെ പുതിയ വാതായനങ്ങൾ തുറക്കണം എന്ന ആശയത്തോടെയാണ് ‘സാഗർമാല പദ്ധതി’ ആരംഭിച്ചത്. മുൻ പ്രധാനമന്ത്രി അടൽ ബിഹാരി വാജ്പേയി തുടങ്ങിവെച്ച റോഡുകളെ ബന്ധിപ്പിക്കുന്നതും നദീജല പദ്ധതികളും നരേന്ദ്രമോദി മുന്നോട്ട് കൊണ്ട് പോവുന്നു.

ജപ്പാൻ പ്രധാനമന്ത്രി ഇന്ത്യയിൽ വന്ന് ഗംഗാ ആരതിയിൽ പങ്കെടുത്തത് നിസ്സാര കാര്യമല്ല. അറബ് രാജ്യത്ത് രൂപപ്പെടുന്ന ഒരു മഹത്തായ ക്ഷേത്രം നയതന്ത്രത്തിൻെറ കൂടി വിജയമാണ്. പല തീരുമാനങ്ങളും എടുക്കാൻ ലോകശക്തികൾ ഇന്ത്യയിലേക്കാണ് നോക്കുന്നത്. രാജ്യത്തിന്റെ താൽപര്യം മുൻനിർത്തിയാണ് പ്രധാനമന്ത്രി വലിയ തീരുമാനങ്ങൾ എടുത്തത്. അത്തരത്തിൽ ഏതെങ്കിലും തീരുമാനം ജനങ്ങൾക്ക് ഉൾക്കൊള്ളാൻ സാധിച്ചില്ലെന്ന് തോന്നിയാൽ അദ്ദേഹം അപ്പോൾ തന്നെ അത് തിരിച്ചെടുക്കാനും തയ്യാറാവാറുണ്ട്. രാജ്യത്തിൻെറ പൊതുതാൽപര്യവും ജനങ്ങളുടെ ക്ഷേമവുമാണ് അദ്ദേഹം പ്രധാന്യം കൊടുക്കുന്ന ഘടകങ്ങൾ.