കണ്ടക്ടർമാരില്ല: KSRTC സർവീസ് മുടങ്ങി; യാത്രാക്ലേശം രൂക്ഷം

തെക്കൻ കേരളത്തിലും മധ്യകേരളത്തിലുമാണ് ഏറ്റവുമധികം കെഎസ്ആർടിസി സർവ്വീസുകൾ മുടങ്ങിയത്. എറണാകുളം ജില്ലയിൽ പകുതിയിലധികം സർവീസുകൾ മുടങ്ങി. ഏകദേശം 120-ലേറെ സർവീസുകളാണ് എറണാകുളത്ത് മുടങ്ങിയത്. 16 സിറ്റി സർവീസുകളിൽ എട്ടെണ്ണവും എറണാകുളത്ത് ഓടിക്കാനായിട്ടില്ല. പെരുമ്പാവൂർ ഡിപ്പോയിൽ 30 സർവീസുകളിൽ 15 എണ്ണവും മുടങ്ങി. കോതമംഗലത്ത് 25 സർവീസുകൾ മുടങ്ങി. എം പാനൽ കണ്ടക്ടർമാരെ പിരിച്ചുവിട്ടത് തിരുവനന്തപുരത്തു 20 ശതമാനം സർവീസുകളെ ബാധിച്ചു. പാപ്പനംകോട് ഡിപ്പോയിൽ 12 സർവീസും ആര്യനാട്ട് 10 സർവ്വീസും മുടങ്ങി. ആര്യനാട്ട് ആകെ 30 സർവീസാണുള്ളത്. മലബാർ മേഖലയിൽ 94 സർവ്വീസുകൾ മുടങ്ങി. വയനാട്ടിലെ ഗ്രാമീണ സർവിസുകൾ താളം തെറ്റി.

ആലുവ: 31

പെരുമ്പാവൂർ: 15

കോതമംഗലം: 15

മുവാറ്റുപുഴ:28

കൂത്താട്ടുകുളം: 9

പറവൂർ: 25

അങ്കമാലി: 15

പിറവം: 32

പുതുക്കാട് II

ചാലക്കുടി 13

കൊടുങ്ങല്ലൂർ 11

ഗുരുവായൂർ 7

ഇരിങ്ങാലക്കുട - 6

തൃശൂർ 2

മണ്ണാർക്കാട് - 1

ചിറ്റൂർ - 1

വടക്കഞ്ചേരി - 1

മലപ്പുറം-15

കോഴിക്കോട്-15

കാസർകോട്-15

കണ്ണൂർ-8

എം പാനൽ കണ്ടക്ടർമാരെ പിരിച്ചുവിടാനുള്ള ഹൈക്കോടതി ഉത്തരവ് നടപ്പാക്കിയതോടെ ഇന്നലെ സംസ്ഥാനത്ത് എണ്ണൂറോളം സർവീസുകൾ മുടങ്ങിയിരുന്നു. ഏറ്റവുമധികം കെഎസ്ആർടിസി ബസുകൾ സർവീസ് നടത്തുന്ന തിരുവനന്തപുരം ആസ്ഥാനമായ തെക്കൻ മേഖലയിൽ മാത്രം 300 സർവീസാണ് ഇന്നലെ മുടങ്ങിയത്. എറണാകുളം മേഖലയിൽ 360 സർവീസുകളും മലബാർ മേഖലയിൽ 155 സർവീസുകളുമാണ് ഇന്നലെ മുടങ്ങിയത്.

ഇന്നലെ കെ.എസ്.ആർ.ടി.സിക്കെതിരെ രൂക്ഷവിമർശനമുയർത്തിയ ഹൈക്കോടതി, ഇന്ന് മുതൽ ഒരു താൽക്കാലിക ജീവനക്കാരൻ പോലും സർവീസിലില്ലെന്ന് ഉറപ്പുവരുത്തണമെന്ന് കർശന നിർദേശം നൽകിയിരുന്നു. ഇതുസംബന്ധിച്ച് സിഎംഡി നേരിട്ട് സത്യവാങ്മൂലം നൽകാനും കോടതി നിർദേശിച്ചിരുന്നു. ഇന്നലെ താൽക്കാലിക ജീവനക്കാർ നൽകിയ പുനഃപരിശോധനാ ഹർജി പരിഗണിക്കാന്‍ ഹൈക്കോടതി വിസമ്മതിച്ചിരുന്നു.