CPM ബ്രാഞ്ച് സെക്രട്ടറിയെ കുത്തിക്കൊന്ന കേസിൽ മുഖ്യപ്രതി പിടിയിൽ; നന്ദനെ പിടികൂടിയത് ചികിത്സയ്ക്ക് എത്തിയപ്പോൾ

അക്രമത്തിനിടെ നന്ദന്റെ ഇടതുകൈയ്ക്ക് പരിക്ക് പറ്റിയിരുന്നു. അതിനാൽ ഏതെങ്കിലും ആശുപത്രിയിൽ ഇയാൾ ചികിത്സ തേടുമെന്ന് പൊലീസ് കണക്ക് കൂട്ടിയിരുന്നു. ‌വിവിധ ആശുപത്രിയിൽ മഫ്ടിയിൽ പൊലീസ് കാത്തു നിന്നിരുന്നു. ഇതിനിടയിലാണ് പ്രതീക്ഷ തെറ്റിക്കാതെ തൃശൂർ നഗരത്തിലെ സ്വകാര്യ ആശുപത്രിയിൽ ചികിത്സയ്ക്കായി നന്ദൻ എത്തിയത്.

എന്നാൽ, മുഖ്യപ്രതി പിടിയിലായിട്ടും രാഷ്ട്രീയ കൊലപാതകമാണോ എന്ന് പൊലീസ് സ്ഥിരീകരിച്ചിട്ടില്ല. കൊല്ലപ്പെട്ട സനൂപിന്റെ സുഹൃത്ത് ചക്ക എന്ന് വിളിക്കുന്ന മിഥുനും അക്രമി സംഘവുമായുള്ള വഴക്ക് പരിഹരിക്കാന്‍ ചെന്നപ്പോഴാണ് കുത്തേറ്റതെന്നാണ് പൊലീസ് പറയുന്നത്. മുഖ്യപ്രതി നന്ദനെ പിടികൂടിയതുമായി ബന്ധപ്പെട്ട് പുറത്തിറക്കിയ വാര്‍ത്താക്കുറിപ്പിലാണ് ഈ വിവരം. കൊലപാതകത്തിന് പിന്നില്‍ രാഷ്ട്രീയമായ കാരണങ്ങള്‍ക്ക് തെളിവ് ലഭിച്ചിട്ടില്ലെന്നാണ് ഉന്നതപൊലീസ് വൃത്തങ്ങൾ നൽകുന്ന സൂചന.

അതേസമയം, സനൂപിന്റേത് രാഷ്ട്രീയ കൊലപാതകമാണെന്നും ആര്‍എസ്എസ് ആണ് കൊലപാതകത്തിന് പിന്നിലെന്നുമുള്ള നിലപാടില്‍ ഉറച്ചുനില്‍ക്കുകയാണ് സിപിഎം. ഉത്തരവാദിത്തത്തില്‍ നിന്ന് ഒഴിഞ്ഞുമാറാനുള്ള ആര്‍എസ്എസിന്റെയും ബിജെപിയുടെയും ശ്രമം വിലപ്പോവില്ലെന്ന് സിപിഎം ജില്ല സെക്രട്ടറിയേറ്റ് പ്രസ്താവനയില്‍ പറഞ്ഞു. എന്നാല്‍, പ്രതി നന്ദന് സിപിഎമ്മുമായാണ് ബന്ധമെന്നാണ് ബിജെപിയുടെ ആരോപണം.